9 айлық қызды құтқарып қалған жолсерік Алтынай Рамбаева марапатталды
Марапатқа ие болғандар арасында 9 айлық қызды өлімнен арашалап алып қалған жолсерік Алтынай Рамбаева да бар. «ҚТЖ» ҰК» АҚ басшылығының шешімімен «Маңғыстау-Астрахан» бағытындағы жолаушылар пойызының жолсерігі «Құрметті теміржолшы» белгісін алды.
Марапаттау рәсіміне кішкентай Фатима да арнайы келді.
Еске сала кетсек, 2017 жылдың 3 шілдесінде пойыз жолсерігі А. Рамбаева 9 айлық Фатиманың өмірін сақтап қалды . Оқиға жолда болған. Мақат станциясында купелердің бірінде баланың өліп қалғаны туралы хабарлайды. Алайда, жолсерік абыржымай, қызды қызметтік бөлмеге алып кіріп, алғашқы медициналық жәрдем көрсетеді. 40 минуттан кейін сәби есін жиып, дем алып, жылай бастады.
«Фатиманың аман қалғаны Алланың қалауы, мен жай ғана себепшімін, - дейді құрметті теміржолшы, - Сол күні ауа райы ерекше ыстық болды. Фатиманың дене қызуы 40 градусты көрсетіп, клиникалық өлімге түсті. Бес жыл сайын аттестациядан өтеміз және онда алғашқы көмек көрсету жолдары туралы сынақ тапсырамыз. Себебі, пойыз шөл даланың ортасымен жүргенде оқыс оқиғалар орын алса, дәрігерлер табылмайды. Сондықтан, әрбір жолсерік алғашқы медициналық көмек көрсету жолдарын білуі тиіс».
Алтынай Рамбаева теміржол саласында 17 жылдан бері қызмет етіп келеді. «Құрметті теміржолшы» белгісі - оның алғашқы марапаты. Ресейдегі «Домашний» телеарнасы Алтынай туралы деректі фильм түсірді .
«Қыркүйек айында Фатима бір жасқа толады, ол менің үшінші қызыма айналды. Ата-анасы Фатиманы мендей теміржолшы болатын шығар деп қалжыңдайды және оның тұсауын кесу мәртебесін маған тапсырды. Сый-сыяпатымды алып, Атырауға барғалы отырмын», - дейді А.Рамбаева.