90 келіге жуық бекірені үйінде заңсыз сақтаған атыраулық 3 жылға сотталды

АТЫРАУ. KAZINFORM – Атырауда 90 келіге жуық бекіре мен 146 грамм қарауылдырықты үйінде заңсыз сақтаған 3 жылға сотталды. Алайда жазасын өтеу мерзімі 3 жылға кейінге қалдырылды.

Атырау қаласындағы №2 сотта азамат К.Ж.-ға қатысты қылмыстық іс қаралды. Оған ҚР Қылмыстық кодексінің 339-бабының 2-бөлігінің 5-тармағымен айып тағылған. 

– 2024 жылғы 17 тамызда тінту жүргізу кезінде К.Ж.-ның Атырау қаласындағы үйінен заңсыз сақталған 90 кг жуық бекіре балығы және 146 грамм бекіре уылдырығы алынған. Сотталушының кінәсі тінту хаттамасымен, сот-биологиялық, сот-тауартану сараптамасының қорытындыларымен дәлелденді, - деп хабарлады соттан. 

Прокурор сотталушыға өсімдіктер мен жануарлардың сирек кездесетін және құрып кету қаупі төнген, сондай-ақ тыйым салынған өсімдіктер мен жануарлар түрлерімен, олардың бөліктерімен немесе дериваттарымен байланысты қызметпен айналысу құқығынан 5 жыл, 3 жыл мерзімге бас бостандығынан айыру түріндегі жазаны тағайындауды ұсынды. ҚР Қылмыстық колексінің 74-бабының 1-бөлігінің негізінде жазаны өтеуді жас балалары 14 жасқа толғанша 3 жыл мерзімге кейінге қалдыруды сұрады.

Алайда айыпталушы мен оның қорғаушылары тағылған айыппен келіскен жоқ. Олар ақтауды сұрады. 

Айыпталушының асырауында үш жас баласы бар. Бұл жаза мен қылмыстық жауаптылығын жеңілдететін мән-жай ретінде танылды. Жазаны ауырлататын мән-жай анықталмады.

– Сот үкімімен К.Ж. тағылған айып бойынша кінәлі деп танылды. Оған өсімдіктер мен жануарлардың сирек кездесетін және құрып кету қаупі төнген, сондай-ақ тыйым салынған өсімдіктер мен жануарлар түрлерімен, олардың бөліктерімен немесе дериваттарымен байланысты қызметпен айналысу құқығынан 5 жыл мерзімге айыра отырып, 3 жыл мерзімге бас бостандығынан айыру түріндегі жаза тағайындалды. Жазаны өтеу мерзімі жас балалары 14 жасқа толғанша 3 жыл мерзімге кейінге қалдырылды, - деп мәлім етті соттан. 

Сот үкімі заңды күшіне енген жоқ. 

Еске сала кетелік, бұдан бұрын еліміздің батысында «Бекіре – 2025» кең ауқымды балық қорғау акциясы басталғанын жазған едік.