Ә.Жақсыбеков: Астананы еліміздегі бизнес жүргізуге ең қолайлы қалаға айналдыру - басты мақсатымыз

АСТАНА. ҚазАқпарат - Бүгін Астана қаласының әкімі Әділбек Жақсыбеков кезекті аппараттық жиын өткізді. Күн тәртібінде үлескерлер мәселесін шешу, елордада бизнес жүргізу үшін қолайлы жағдай жасау, қалалық супермаркеттерде қызмет көрсету жүйесін жақсарту және қаладағы санитарлық жағдайды бақылау мәселелері талқыланды, деп хабарлайды елорда әкімінің баспасөз қызметінен.

Жиын барысында үлескерлер мәселесі туралы сөз қозғаған елорда әкімі жергілікті атқарушы билік жер телімдерін жобалау, құрылыс жүргізу және нысанды пайдалануға беру үшін беретіндігін атап өтті. Ал бұл кезеңдердің бұзылғаны үшін заң алдында құрылыс компанияларының басшылары жауап берулері тиіс.

- Иә, біз бұл нарықтағы жағдайды біліп отыруымыз керек. Құрылыс барысы мен жер телімдерінің игерілуіне талдау жасап отыруымыз керек, - деді Ә. Жақсыбеков.

Оның сөзінше, әлемдік тәжірибеге сүйенсек, мұндай түйткілді мәселелер сот немесе өзге де тиісті органдар арқылы ғана шешіледі.

Астана қаласының ағымдағы санитарлық жағдайына тоқтала келе әкім қала құрылымдарының басты мақсаты - елорданың келбетін тиісті деңгейде ұстап тұру екенін ескертті. Бұл жұмысты бақылауда ұстау үшін әкімнің бұйрығымен жүйелі түрде жұмыс істейтін мобильді топ құрылған. Фотоесептерге және өзге де қағазбастылыққа жол бермеу мақсатында Ә.Жақсыбеков бұл жұмысты электронды түрде жүргізуді тапсырды.

- Жұмыстың қалай жүріп жатқанын кез-келген уақытта қадағалап, көруіміз үшін ескертулерге қатысты барлық суреттер мен есептерді менің және орынбасарларымның кабинеттерінде орналасқан мониторларға шығару қажет. Сол арқылы кемшіліктерді дер кезінде көріп, тез арада олқылықтың орнын толтырамыз, - деді әкім.

Аппарат жиынында талқыланған тағы бір өзекті мәселе - мемлекеттік қызмет көрсету сапасы. Қаладағы бизнес-климатты жақсарту үшін рұқсат беру процедураларын азайту керек. Әкімнің айтуынша, барлық мемқызметтер тек қана ХҚКО арқылы жүзеге асырылуы тиіс және сәйкесінше қызмет көрсету уақыты ұзақ болмауы керек.

Бұл бағытта мемлекеттік қызмет көрсетудегі бизнес-процесстерді зерделеп, оларды оңтайландыру бойынша ұсыныстар енгізу үшін арнайы жұмыс тобын құру керектігі айтылды.

- Бұл жұмысқа бизнес-қауымдастықты, кәсіпкерлер палатасын тарту қажет. Бұл жұмыстарды басқаруды Әлиев Нұрәлі Рахатұлына тапсырамын, - деді әкім. - Басты мақсат - Астананы бизнес жүргізу үшін еліміздегі ең қолайлы қалаға айналдыру. Бұл бағыттағы жұмыстардың маңыздылығын түсінбейтін басшылар жұмыстан босатылады.

Халыққа қызмет көрсету орталықтарының жұмысын ҚР Инвестиция және даму министрлігі қамтамасыз етеді, бірақ жұмыс сапасы қала тұрғындарына әсер ететіні белгілі және оның салдарынан барлық сын әкімдік тарапына жолданады. Бұл ұзын-сонар кезектер мен қолайсыз ішкі логистика, қызмет көрсетуші персоналдың дөрекілігі мен тұрғындардың шағымдары. Жоғарыда аталған жайттарға байланысты Ә.Жақсыбеков әкім аппаратына ХҚКО байланысты барлық ескертулерді жоюға тапсырма берді.

Сондай-ақ Әділбек Жақсыбеков барлық қалалық құрылымдарға Қазақ хандығының 550 жылдығы мен ҚР Конституциясының 20 жылдығына орай өткізілетін мерекелік шараларға дайындық жұмыстарын күшейтуді тапсырды.