Абаев: ҚазАқпарат - сұранысы ең жоғары интернет ресурс
Министр өткен жылы мемлекеттік интернет ресурстардың алдында бүгінгі аудиторияның сұранысына сай кешенді трансформациядан өту міндеті жүктелгендігін баса атап өтті.
«Өткен кезең ішінде «ҚазАқпарат» халықаралық ақпарат агенттігі еліміздегі сұранысы ең жоғары үздік интернет ресурстардың қатарына кірді. Яндекс мәліметтеріне сәйкес, 2016 жылы «ҚазАқпарат» сілтеме жасалуы бойынша бірінші орынға шықты. «ҚазАқпараттың» халықаралық бағытын дамыту мақсатында 2017 жылы оннан астам шетелдік агенттікпен келісімге қол қоюды жоспарлауда. Олардың қатарында Рейтер, Дойче, Пресс-агентур сынды агенттіктер бар», - деді ол.
Сондай-ақ оның айтуынша, «Қазконтент» АҚ құрамындағы 6 сайт та трансформациядан өткен. Оның ішінде «BNews.kz» порталының дизайны, ақпарат тарату үрдісі өзгерді және сараптама мен талдау бағытына көшті.
«Жалпы «Қазконтент» АҚ құрамындағы 8 сайттың қолданушылары жыл сайын өсіп келеді. Өткен жылы ол 50 миллионнан асып жығылды», - деді Абаев.
Дегенмен, министр оларға мемлекет тарапынан көрсетіліп отырған қолдау шараларына қарамастан жекеменшік ақпараттық сайттар мен ресурстардан артта қалып отырғандығын айтты.
«ҚазАқпаратқа», ең алдымен «Қазконтентке» рейтингті көтеру, менеджмент пен маркетингті, жобалардың сапасын арттыру бойынша түбегейлі шешімдер қабылдау керек. Ақпарат комитетіне «ҚазАқпарат» пен «Қазконтентке» жеке ақпараттық сайттардың рейтингін негізге ала отырып, КРІ бекітуді тапсырамын», - деді Абаев.