Абай күнінде абайлықтар азаннан ерте тұрып, Қарауылға қарай бет түзеді. Тек өңір халқы емес, Қазақстанның түгел дерлік облысы мен шетелден де қонақтар келген.
Жиналған жұртқа арналып ақшаңқан киіз үйлер тігілген. Әр киіз үйді қала, аудан әкімдіктері, басқармалар, департаменттер мен түрлі ұйымдар тұрғызған. Абай мерейтойындағы киіз үй саны да тұп-тура 180-ге жетеді.
Киіз үйлер ішінде дастархан жайылған. Бірақ "қазір той қуалайтын емес, ой қуалайтын заман" деп Президент айтқандай, аста-төк қылып емес, тек бірнеше тағам түрлері қойылған.
Сыртта халыққа қол жуғыш та қойылыпты. Сабын мен орамал да тұр.
Тазалыққа ерекше мән беріліпті. Қоқыс жәшіктері толып қалмасын деп жұмысшылар лезде тазалап қойып жатыр.
Ал басқа бір жақта сауда-саттықтың көркін келтіргендер көп.
Жұрт назарына Абайдың кітаптары, хакім аты жазылған кәдесыйлар, ыдыстар, ұлттық оюмен өрнектелген киім-кешек, тақия, домбыра, қамшы және басқа да түрлі тауарлар ұсынылған.
Жүрек жалғағысы келгендер кәуәп пісіріп жатқандардың қасына жақындайды.
Көліктің көптігі сонша кей жүргізушілер жерден тұрақ таппай темір тұлпарларын тау бөктеріне қойып кеткен.
Жиналғандар үшін әжетханалар салыныпты. Патшалар жаяу баратын жерде ешқандай кезек жоқ.
Жастар мен балалар алтыбақанға отырып, мәз-мейрам.
Сахнада Абайға арналған театрландырылған қойылым қойылып, әншілер ән мен биден шашу шашты.
Қазір концерт бітіп, ел бәйге көруге бет түзеген.
Кешке қарай "Желсіз түнде жарық ай" гала-концерті болып, көмейіне бұлбұл ұялаған танымал әншілер өнер көрсетпек. Сондықтан ешкім де үйіне қайтуға асығар емес.
Еске салсақ, осыған дейін Абай тойында 10 жасар Алинұр сауданы қыздырып жүргені жайлы жазғанбыз.