Абай облысының ауыл шаруашылығын жақсарту стратегиясы шеңберінде жылыжайлар орнату, мал шаруашылығын дамыту, әлеуметтік-экономикалық даму және инфрақұрылымдық объектілер салуды қамтитын Жол картасы әзірленуде. Осы жұмыстардың тиімділігін арттыруға Целиноград ауданы Родина ауылының табысты тәжірибесі негіз болып отыр.
«Бесқарағай ауданының аумағында жалпы ауданы 2 гектар болатын жыл бойғы жылыжай салу жоспарланып отыр. Бұл азық-түлік қауіпсіздігін қамтамасыз ете отырып, маусымдық тәуелділікті азайтады, көкөністерді жыл бойы өсіруге мүмкіндік береді. Тамшылап суарылатын қосымша 5 гектар жерге көкөністерді маусымдық өсіру ұйымдастырылады. Бұл суды ысырапсыз пайдаланудың тиімділігін арттырады», - деп хабарлады Абай облысы әкімдігінен.
Үржар ауданы Таскескен ауылында асыл тұқымды «Ақбас» ірі қара малын өсіру қолға алынбақ. Бұл жоба ет өндіруді арттырып, жаңа жұмыс орындарын ашады. Сондай-ақ көмір бағасын тұрақтандырып әрі жергілікті тұрғындар үшін қолайлы жағдай жасайтын қысқы отын қоймасын салу көзделген. Жоба 2025 жылға жоспарланған.
«Бородулиха ауданының Петропавловка ауылдық округінде ұзындығы 9 шақырым жолға орташа жөндеу жүргізілді. Осы учаскеде көше жарығы орнатылып, ауылдағы орталық саябақ абаттандырылды. Хоккей корты да салынды. Сонымен қатар ауылда жаңа балалар ойын алаңы пайда болды. Мектепке автобус сатып алынды. Ауылішілік жолдардың 1 шақырымына инертті материал төгілді. Қазіргі таңда қараусыз қалған жерлерді қалпына келтіру жұмыстары жүргізілуде», - делінген ақпаратта.
Ақсуат ауданы Екпін ауылында клубтық үйлер мен аз қамтылған отбасыларға арналған жалға берілетін үйлер салу үшін жобалар іске асырылды. «Мәуліт» шаруа қожалығы асыл тұқымды «Ақбас» ірі қара малын өсірумен айналысады. Шаруашылық 7 210 гектар жайылым, 650 гектар шабындық, 1 000 гектар егістік жерге ие. 2 000 бас ірі қара, 1 000 қой және 700 жылқысы бар. Болашақта өнімді Қытайға экспорттау мақсатында шағын консерві цехын ашу көзделген.
Көкпекті ауданында сүт өнімдерін өндіру жолға қойылып жатыр. Сүт фермасын дамыту нәтижесінде өнім көлемі күн сайын 11 тоннадан 20 тоннаға дейін артады. Жұмысшылар үшін төрт пәтерлі жаңа үй, балалар ойын алаңы салынбақ.
«Саржал ауылдық округінде қымыз өндірісі тұрақты дамып келеді. Қазіргі таңда күн сайын 100 литрге дейін қымыз өндіріледі. Бүгінде ірі супермаркеттермен келісім шарттар жасалды. Өндіріс қуатын тәулігіне 5 тоннаға дейін ұлғайту, қосымша жабдықтар сатып алу және өнімді республикалық тауар айналымына шығару жоспарлануда. Бұл жаңа жұмыс орындарын құруға мүмкіндік береді», - делінген әкімдік мәліметінде.
Өңір басшысы Нұрлан Ұранхаев аудан әкімдеріне жобалардың іске асырылу барысын қатаң бақылауды, халықпен және бизнес өкілдерімен тұрақты кездесулер өткізуді тапсырды. Ауылдық округтерді дамыту жөніндегі Жол картасы ауыл шаруашылығын жақсартуға, жаңа жұмыс орындарын құруға, әрі халықтың өмір сүру сапасын арттыруға бағытталған. Сондықтан заманауи технологияларды қолдану, инвестиция тарту аймақтың тұрақты дамуында шешуші рөл атқарады.