Абай облысында жол апатынан 4 адам мерт болды

СЕМЕЙ. KAZINFORM — Абай облысында екі автокөлік соқтығысып, 4 адам көз жұмды.

Облыстық полиция департаменті баспасөз қызметінің хабарлауынша, жол-көлік оқиғасы 19 ақпанда сағат 15:25–те болған.

— Алдын ала мәлімет бойынша, Омбы-Майқапшағай тасжолының 867-шақырымында, Салқын-Төбе ауылының маңында Lada Priora және Chevrolet Cobalt маркалы автокөліктер бетпе-бет соқтығысқан. Соның салдарынан 4 адам қаза болып, тағы үш адам түрлі дене жарақаттарын алды. Аталған дерек бойынша сотқа дейінгі тергеу басталды, — деп хабарлады ведомство өкілдері.

Тиісті сараптамалар тағайындалып, оқиғаның барлық мән-жайы анықталып жатыр.

Еске салсақ, осыған дейін СҚО-да жүк көлігінің жүргізушісі әріптестерін бетпе-бет соқтығысудан сақтап қалғаны хабарланған.