Адал инвесторлардың мүдделері толығымен қорғалады – Әлішер Сатыбалдиев
Сенат депутаты Әлішер Сатыбалдиев Президенттің сайлауалды бағдарламасында атқарылған ауқымды жұмыстардың бірі саяси институттарды жетілдіру туралы айтты.
«Бір жылда Президенттің сайлауалды бағдарламасында жоспарланған жұмыстардың бірқатары жүзеге асты. Әсіресе елімізде атқарылған ауқымды жұмыстардың бірі деп саяси институттарды жетілдіру бойынша реформаларды айтсақ болады. Сайлауалды бағдарламада көзделген межелерге жету үшін заңдық негіздеме жасалғанын атап өткен жөн.
ҚР Президенті Қасым-Жомарт Тоқаевтың экономикалық және саяси реформаларының қисынды жалғасы болған «Заңсыз сатып алынған активтерді мемлекетке қайтару туралы» Заң қабылданды. Оның нормалары әкімшілік-билік ресурстарына ие болған немесе осындай қолдауды пайдалана алатын олигополия субъектілеріне қатысты қолданылады. Сонымен қатар адал инвесторлардың мүдделері толығымен қорғалады.
ҚР Премьер-Министрінің төрағалығымен Заңсыз сатып алынған активтерді мемлекетке қайтару мәселелері жөніндегі комиссия құрылды. Оның құрамында белсенді азаматтық ұстанымы бар қоғам қайраткерлері, Парламент депутаттары мен Үкімет мүшелері бар.
Бүгінгі таңда мемлекетке шамамен 1 трлн теңге сомасындағы активтер қайтарылды. Оның шамамен 600 млн-ы басқа юрисдикциядан қайтарылған активтер. Мысалы, БАӘ-ден шамамен – 15 миллион доллар, Аустриядан – 82 миллион доллар, Лихтенштейннен – 260 миллион доллар, Гонконгтан – 2 миллион доллар қайтарылды.
Президенттің сайлауалды бағдарламасында көзделген мақсаттарды орындау үшін көлеңкелі экономикаға қарсы іс-қимылдың 2023-2025 жылдарға арналған кешенді іс-шаралар жоспары енгізілді. Көлеңкелі экономиканың үлесін 2025 жылға қарай ЭЫДҰ елдерінің деңгейіне жеткізе отырып, ЖІӨ-ге 15%-ға дейін төмендету қажет. 2022 жылы елдегі мемлекеттен жасырылған экономикалық қызмет көрсеткіші ЖІӨ-ге шамамен 18,7%-ды құрады (жоспар бойынша 19,9%). Бұл да бір жетістік.
«Ұлттық қор – балаларға» жобасы 2024 жылдың 1 қаңтарынан бастап іске қосылады. Осы күннен бастап Ұлттық қордың инвестициялық кірісінің 50%-ы 18 жасқа дейінгі балалар арасында бөлінеді;
Биыл 1 наурыздан бастап жас кәсіпкерлер үшін 2,5%-бен шағын несие беру көзделген. Қазірдің өзінде 24 млрд. теңгеден астам сомаға 5 мыңнан астам шағын несие мақұлданды;
2023 жылы Ауылдық аумақтарды дамыту тұжырымдамасы қабылданды, мемлекет меншігіне 8 млн. га пайдаланылмаған жер қайтарылды;
2023 жылы «Қуатты өңірлер – елді дамытудың драйвері» ұлттық жобасы аясында инженерлік-коммуникациялық инфрақұрылым объектілерін салуға 5,4 млрд. теңге бөлінді», - деді Әлішер Сатыбалдиев.