Адамдар тамақтанатын орындардың бәрі санитарлық талаптарға сай болуы керек - БҚО әкімі
Өңір басшысы шағын және орта бизнесті қолдау үшін шығарылған заңдар бойынша шағын тамақтану орындарына санитарлық тексеріс жүргізе алмайтынын айтқан БҚО тұтынушылар құқығын қорғау департаменті басшысының міндетін атқарушы Алтын Орынғалиеваға нақты тапсырмалар жүктеді.
«Біз орта және шағын бизнес өкілдеріне барлық жағдайды жасап отырмыз. Бірақ бизнес өкілдері де өз жауапкершіліктерін терең сезінуі қажет. Ең бастысы - тұрғындардың денсаулығы. Біз адамдар тамақтанатын шағын орындарға санитарлық аудит жүргізе аламыз. Сондықтан облыстық тұтынушылар құқығын қорғау департаменті мен өңірлік кәсіпкерлік палатасы бірлесіп, қараша айының соңына дейін облыс орталығындағы және аудандардағы көпшілік жерлердегі тамақтану орындары бар бизнес өкілдерінің әрқайсысымен жеке кездесу арқылы санитарлық талаптарды қадағалауды, түсіндіру жұмыстарын жүргізуді тапсырамын. Ал осы оқиғаға байланысты заңға сәйкес шараларды қолға алу керек», - деді облыс әкімі Алтай Көлгінов.
Еске сала кетейік, ҚазАқпарат бұдан бұрын хабарлағанындай, облыстық жұқпалы аурулар ауруханасына 29 адам түссе, соның 24-інен сальмонеллез ауруы анықталып отыр. Қалған бесеуіне қатысты қорытынды әлі келген жоқ.