Адамдар зардап шеккен жоқ: Маңғыстауда газ құбыры желісіндегі өрттің жайы белгілі болды

АҚТАУ. KAZINFORM – Маңғыстауда магистралды газ құбырында орын алған өрттің шығу себебіне қатысты жауапты тарап пікір білдірді.

Кеше түнде өңірдегі Бейнеу ауданында «Орталық Азия – Орта магистралды газ құбыры» желісінде жарылыс оқиғасы орын алған болатын. Аталған жағдайға қатысты «Қазақгаз» АҚ жағдайға қатысты түсініктеме берді.

«18 наурызда шамамен кешкі сағат 23.00-де «Орталық Азия – Орта магистралды газ құбыры» лупингінің күзетілетін аймағының конденсат жинағышы желісінде газ ауа қоспасы жарылып, арты өртке ұласты. Сағат 23:13-де келісім бойынша қызмет көрсететін мемлекеттік емес өртке қарсы қызметі тілсіз жауды толық сөндірді. Оқиғадан зардап шеккендер жоқ. Газ тасымалдау нысандарына залал келмеген. Сонымен қатар мұнда жұмыс штаттық режимде жүріп жатыр», - деп жазылған «Қазақгаз» АҚ таратқан ақпаратта.

Белгілі болған дерек бойынша, өрт халықты газбен қамтамасыз ету және газды тасымалдау жұмыстарына еш кедергі келтірмеген. Қазіргі уақытта өрттің шығу себебі анықталып жатыр.

Осыған дейін Маңғыстауда «ИнтергазОрталықАзия» АҚ-ның САЦ-4 магистральді газ құбырында жарылыс болғаны айтылған еді.