АСТАНА. KAZINFORM — Ағылшындық «Челси» клубы футболдан Конференция лигасында қатарынан төрт жеңіске қол жеткізіп, 12 ұпаймен көш бастап келеді.
Италиялық маман Энцо Маресканың шәкірттері соңғы кездесуінде Германияның Хайденхайм қаласында жергілікті клубты 2:0 есебімен тізе бүктірді.
Екінші таймда 51-минутта Кристофер Нкунку есеп ашса, 86-минутта Михаил Мудрик ойынның нүктесін қойды – 2:0.
«Хайденхайм» да бұған дейін жеңілмей келе жатқан еді.
Лондондық клубтың Англия чемпионатында да жағдайы жаман емес, 22 ұпаймен турнир кестесінде 3-орында тұр.
Атақты ағылшын клубтарының бірінен саналатын «Челси» Конференция лигасындағы келесі кездесуін 12 желтоқсанда Алматыда «Астанамен» өткізеді.
Астаналықтар Конференция лигасында 4 ұпаймен әзірге 23-орында тұр. Жарысты жалғастыруға мүмкіндік беретін 24 команданың қатарына ілігу үшін Григорий Бабаянның шәкірттері қалған екі матчты барынша сәтті өткізуі керек-ақ.
Еске сала кетейік, бұдан бұрын Конференция лигасында «Астананың» португалиялық «Витория» командасымен тең тарқасқанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).