Бұл туралы бүгін өткен брифингте ҚР Статистика агенттігінің төрағасы Әлихан Смайылов хабардар етті.
«2011 жылдың қаңтар-шілдесінде тұрғын үйлерді сату-сатып алу бойынша жасалған келісімдердің саны 83 127-ні құрап, өткен жылдың сәйкес кезеңіне қарағанда 12,1 пайызға артты. Яғни, тұрғын үй нарығы жандана бастады. 7 айдың көрсеткіші бойынша (ред. - өткен жылмен салыстырғанда) сату-сатып алу келісімдердің саны Астана қаласында - 5 пайызға, Алматы қаласында - 0,2 пайызға өсті», - деп атап өтті ол.
Статистикаға сүйенсек, 2011 жылдың шілдесінде республикада жылжымайтын мүлікті сату-сатып алу бойынша барлығы 13 672 келісім жасалған. Бұл алдыңғы аймен салыстырғанда 5,3 пайызға аз. Баспананы алып-сатумен ең көп айналысқан Алматы қаласының тұрғындары болды - 1786, одан кейінгі орында Шығыс Қазақстан облысы (1 681), Қарағанды облысы (1 615), Оңтүстік Қазақстан облысы (1 353), Алматы облысы (1 160), Қостанай облысы (807), Астана қаласы (772) тұр.