Жиында «Әкелер одағы» РҚБ төрағасы Мақсұтбек Айтмағанбет әкелер бірлестігінің құрылу тарихына тоқталып, форумның маңыздылығын атап өтті.
Әкелер форумында ұлттық құндылықтар, патриотизм, инклюзия, отбасылық білім, өмірлік дағдылар, мектептердегі әкелер кеңесі және бұқаралық спорт тақырыптарында 7 сессия өтті.
«Биыл Әкелер одағының құрылғанына 10 жыл толады. Осы жылдар ішінде қозғалыс еліміздің барлық өңірлерін қамтыды. Жауапты, саналы және позитивті ата-ана болуға бағытталған 1000-нан астам жоба іске асырылды», - деді М.Айтмағамбет форумның ашылуында.
Педагог-коуч Ғалымбек Бермағамбетовтің айтуынша, Әкелер форумының нақты нәтижесі – көп мектептерде әкелер кеңесінің құрылуы болды.
«Көп жағдайда мектепте ата-аналар жиналысы десе, оған аналар ғана баратын. Ал қазір әкелер кеңесі жиі өтеді, жылдық жоспар жасалып, әкесі жоқ балаларға әке орнын толтыру мәселелері талқыланады. Тағы бір өзекті мәселе – қазіргі әкелер көбіне банкоматқа ұқсап барады, тек материалдық қажеттілікке ғана мән беру көбейді. Бала тәрбиесін де бизнес тілімен айтсақ, өз жұбайына, тәрбиешіге «аутсорсқа» жіберді. Ана қанша жерден мықты болса да, әкенің орнын толтыра алмайтынын, әке де ананың орнын, мұғалім де ата-ананың орнын баса алмайтынын жақсы білеміз. Әкелер одағы осы мәселені халыққа жеткізіп, ой салуға тырысып жүр», - деді Ғ. Бермағамбетов.
Педагог бала тәрбиесі жар таңдаудан басталатынын еске салды.
«Адам не үшін үйленіп жатқанын, әрі қарай отбасы қандай бағытта өрбитінін саналы түрде түсініп үйленуі керек. «Баланы емес, өзіңді тәрбиеле» деген тұжырым көптеген ұлттың философиясында кездеседі. «Бала – ата-ананың орындалмай қалған арманы» деген де сөз бар. Яғни, бір әке шылым шегуді қоя алмаса, өз жігерін жеңе алмаса, баласының шылым шекпегенін қалап, тыйым сала бастайды. Демек, балаға үлгі ретінде болуы керек. Көп әкелер баласына үлгі болу сынды алға үлкен міндет қоймағандықтан, қоғамда зорлық-зомбылық, ажырасу жиіледі», - дейді Ғ. Бермағамбетов.
Сонымен бірге, ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссия Әкелер одағының құрылуына ықпал еткен.
«Бүгін барлық 7 сессияда елге үлгі көрсете алатын, бас болатын ер-азаматтарды көріп қуандық. Өйткені, Әйелдер ісі жөніндегі комиссия Әкелер одағының құрылуының басында тұрды. Ең бірінші, форумды өзім жүргізген едім. Бүгінде Әкелер форумы қанатын жайып, елге пайдалы ұйымға айналды», - деді ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссия төрағасының орынбасары Ләззат Сүлеймен.
Мемлекеттік-әлеуметтік сақтандыру қорының мәліметінше, 2021 жылы 3,5 мың ер адам бала күтімі бойынша демалыс алған.
«Тағы бір үміт беретін мәлімет – Қазақстандық қоғамдық даму институтының сауалнамасына қатысқандардың 40 пайызы отбасындағы бала күтімі мен тәрбиелеу міндеттерін тең бөлісетінін айтқан. Бұл сауалнама қатысқан 72,3 пайыз ата-ана балалармен бірге серуендеуді, бос уақыт өткізуді жиі ұйымдастыратынын көрсетті. Дегенмен, әлеуметтік жетімдік сын-қатері, ассоциалды мінез-құлық көбеюде, қазір біздің мемлекетке ата-ана міндеттеріне дайындық бойынша кәсіби жұмысты ұйымдастыру қажет деп есептейміз», - деді Л. Сүлеймен.
Қазір Әйелдер ісі жөніндегі комиссия бастамасымен әрбір аудан орталықтарында отбасын қолдау орталықтарын ашу жоспарланып отыр.
«2025 жылға дейін осындай 234 орталық ашу жоспарланған. Онда отбасыға барлық кешенді көмек көрсетіледі, қаражат та бөлініп отыр. Енді жергілікті атқарушы биліктен мұның формалды түрде болып қалмай, шын мәнінде қажеттілігі бар адамдарға көмек беру мүмкіндігін жасауды сұраймыз», - деді Л. Сүлеймен.