Қ.Құрманбаев атындағы Ақмола облыстық фтизиопульмонология орталығы - COVID-19 індетіне қарсы күресте алдыңғы қатарда болған ауруханалардың бірі.
Бастапқыда 25 провизорлық төсек-орын болса, кейін індеттің өршуіне байланысты 135 төсек-орындық жұқпалы індетке арналған бөлімше болып ұлғайтылды.
«Бүгінгі күні бізде 120 төсек-орын бар, оның 5-уі балаларға арналған болса, 10-ы жансақтау бөлімшесінде. Бөлімшеде 86 медицина қызметкерлері еңбек етуде. Оның ішінде 8 дәрігер, 36 орта және 39 кіші медицина қызметкері бар. Жыл басынан бері бөлімшеге 137 науқас түсті. Олардың 71 емделіп шықса, 8-і көз жұмды. Бүгінгі күні бөлімшеде 79 науқас ем қабылдауда, оның ішінде 12 науқас ауыр жағдайда жансақтау бөлімінде жатыр. Бұл науқастардың 17-і ғана індетке қарсы екпе алған», - деді Жұмабек Махашев.
Орталық директоры атап өткендей, індеттен сауығып шыққан науқастардың денсаулығын қалпына келтіруге де ерекше көңіл бөлінеді.
«Жалпы осы мәселеге байланысты 2021 жылдың мамыр айында орталығымызда COVID-19 індетімен ауырған науқастарға арналған оңалту бөлімшесі ашылып, жұмыс істеп тұр. Онда ем алу курсы - 10 күн. Бөлімшеде науқастарды оңалту үшін барлық жағдай жасалған», - деп толықтырды Жұмабек Махашев.