Ақмола облысында мотоцикл тізгіндеген жасөспірім 8 жасар баланы қағып кетті

КӨКШЕТАУ. KAZINFORM – Ақмола облысында мотоцикл тізгіндеген жасөспірім кішкентай баланы қағып кетті. Салдарынан 8 жасар бүлдіршін ауруханаға түсті. 

Облыстық ПД баспасөз қызметінің мәліметінше, оқиға Біржан сал ауданының Бұланды ауылында болған. Мемлекеттік тіркеу нөмірі жоқ «Sonlink» мотоцикліне рұқсатсыз отырған ауылдың кәмелеттік жасқа толмаған тұрғыны велосипедтегі баланы қағып кетті.

«Жол-көлік оқиғасы салдарынан 8 жасар бала түрлі дене жарақтымен Макинск қаласының орталық аудандық ауруханасына жатқызылды. Полицейлер көлік құралдарын басқаратын адамдардың жол қозғалысы немесе көлік құралдарын пайдалану ережелерін бұзуы бойынша сотқа дейінгі іс жүргізуді бастады, - деді ведомстводан. 

Айта кетсек, жыл басынан бері Ақмола облысында мотоцикл жүргізушілері 70-ке жуық жол қозғалысы ережесін бұзған. 

Еске салайық, бұдан бұрын Ақмола облысында жол апатынан 15 жастағы жасөспірім көз жұмды.