Ақмола облысында өндіріс орнында жұмысшы әйелді жүк көлігі басып кетті
КӨКШЕТАУ. KAZINFORM — Ақмола облысында өндіріс орнында жүк көлігі басып кеткен жұмысшы әйел көз жұмды, полиция іс қозғады.
Ақмола облысы ПД баспасөз қызметінің мәліметінше, оқиға Егіндікөл ауданындағы жергілікті өндіріс орнында болған.
Бұл туралы аудандық полиция бөліміне дәрігерлік амбулатория фельдшері хабарлап айтқан.
Анықталғандай, ЖШС аумағында Түркістан облысының 57 жастағы тұрғыны басқарған жүк көлігі бұрылу кезінде жұмысшыны абайсызда басып кеткен.
Әйел алған жарақатынан сол жерде қайтыс болды.
«Осы дерек бойынша сотқа дейінгі тергеу басталды. Сот-медициналық сараптама тағайындалды, мемлекеттік еңбек инспекторы тексеріс жүргізіп жатыр», — деді ведомстводан.
Айта кетсек, бұдан бұрын Ақмола облысында су құбырын тартып жатқан жұмысшыны топырақ басып қалғанын жазған едік.