Ақмола облыстық соты баспасөз қызметінің мәліметінше, жұмыссыз жүрген бес адам бірігіп, зергерлік дүкеннен 12 млн теңгенің бұйымдарын және кассадан 70 мың теңгенің ақшасын қолды қылған (ҚК 188-бабы 3-тармағының 4-бөлігі).
Істі қарау барысында сотталушылар прокурормен кінәсін мойындау туралы мәміле нысанында іс жүргізу келісімін жасасты.
Сотталушыларға жаза тағайындау кезінде сот жеңілдететін жағдайларды яғни, іс-әрекетке шын жүректен өкіну және асырауында жас балалардың болуын ескерді. Жазаны ауырлататын жағдайлар анықталған жоқ.
Дүкен иесіне келтірілген залалды кінәлілер толығымен өтеді, сондықтан жәбірленуші оларды қатаң жазаламауды өтінді.
- Сот үкімімен төрт сотталушы шартты түрде әрқайсысы 5 жыл бас бостандығынан айыру жазасына кесілді, пробациялық бақылау белгіленді. Ал, біреуіне бұрынғы өтелмеген соттылығы және ол бойынша өтелмеген жазаның ішінара қосылуы ескеріле отырып, 5 жыл 6 ай нақты бас бостандығынан айыру жазасы тағайындалды, - деді Ақмола облысы сотының баспасөз қызметінен.
Сот үкімі заңды күшіне енген жоқ.
Айта кетсек, бұдан бұрын Ақмола облысында бюджет қаржысын жымқырған сыбайластар сотталғанын жазған едік.