Қазақстанда 2017 жылдан бері қыркүйектің 5-де тілдер күні мерекесі аталып өтіледі. Ол қазақ әліпбиінің негізін қалаушы, көрнекті әдебиеттанушы және реформатор-лингвист Ахмет Байтұрсыновтың туған күніне орайластырылған.
Жиналғандарды тілдер күнімен аймақ басшысы Марат Ахметжанов құттықтап, тілдің ұлттың ұлы қазынасы, халықтың рухани қуатының негізі екенін атап өтті.
«Елімізде жүргізіліп жатқан сындарлы тіл саясаты толерантты тілдік ортаны қалыптастырудағы маңызды құндылықтардың бірі болып табылады. Сондықтан мемлекеттік тілді басқа этностардың тілдерімен бірге дамыту мемлекет тұрақтылығының басты кепілі», - деді құттықтау сөзінде аймақ басшысы.
Шарада тілдерді оқытудағы жетістіктерді графикалық түрде көрсететін стендтер, мемлекеттік және басқа да тілдерді оқыту бойынша оқу құралдары, әдістемелік жинақтар ұсынылған көрме ұйымдастырылды.
Сонымен бірге, 10 аталым бойынша Ақмола облысы әкімінің «Тіл жанашыры» арнайы сыйлығына ие болғандар марапатталды.
Облыста қазақ тілін үйрену бойынша жоспарлы жұмыстар жүргізілуде. 149 мектеп пен 300-ге жуық мектепке дейінгі мекеме қазақ тілінде жұмыс істейді. Жаңа оқу жылында 5 мектеп ашылды, оның ішінде Целиноград ауданының Өтеміс ауылында, Көкшетау және Қосшы қалаларында мемлекеттік тілде оқытатын 3 мектеп бар.
20 жылдан астам уақыт бойы облыстың барлық өңірлерінде тілдерді дамыту орталықтары жұмыс істейді, онда кез келген тұрғын қазақ және ағылшын тілдерін үйрене алады. Қазақстан халқы Ақмола Ассамблеясының жанында «Шаңырақ» мектебі жұмыс істеуде.
Жалпы, Қазақстан Республикасы халқының тілдері күніне арналған жыл сайынғы онкүндік барысында облыста мемлекеттік тіл мен өңірде тұратын этностардың тілдерін дамытуға бағытталған 2000-нан астам түрлі форматтағы іс-шаралар өткізілді.
Айта кетсек, бұдан бұрын көкшетаулық орыс қызы Алена Малькова-Солопова тіл үйренем деушілерге қазақ тілінен сабақ беріп жүргенін жазған едік.