Ақмола облысында жұмысшының өндірісте жарақат алуына байланысты іс қозғалды

КӨКШЕТАУ. ҚазАқпарат - Ақмола облысында ер адам өндірістік жарақат алды. Полиция еңбекті қорғау ережелерін бұзу бойынша қылмыстық істі тергеп жатыр, деп хабарлайды ҚазАқпарат тілшісі облыстық ПД баспасөз қызметіне сілтеме жасап.

Ведомствоның мәліметінше, биылғы 31 шілдеде Көкшетау қалалық ПБ кезекші бөліміне жергіліктігі медициналық мекемеден хабар түскен.

Онда ауруханаға «оң жақтағы үлкен ортаңғы жіліншіктің үштен бір бөлігінің ашық сынуы, оң жақ тобықтың жыртылуы» диагнозымен 42 жастағы ер адам жеткізілгені айтылады.

«Белгілі болғандай, ер адам Краснояр ауылының тұрғыны және жергілікті ЖШС-нің бірінде прессовщик болып жұмыс істеген. Сол күні сағат 16:40 шамасында Краснояр ауылындағы металл базасында жұмыс үстінде жүк көтергіш аяғын басып кеткен. Осы дерекке байланысты Қылмыстық кодекстің 156-бабы 1-бөлігі бойынша сотқа дейінгі іс қолға алынып, сараптама тағайындалды», - деді ведомстводан.

Жыл басынан бері Ақмола облысының аумағында еңбекті қорғау ережесін бұзу бойынша 20 қылмыстық іс тіркелген.

Айта кетсек, бұдан бұрын Ақмола облысында топырақ басып қалған 59 жастағы жұмысшы көз жұмған еді.