Ақсай қаласында пәтердегі өрт орнынан 58 жастағы ер адамның мүрдесі табылды
ОРАЛ. KAZINFORM – Ақсай қаласында бес қабатты үйден өрт шығып, оқиға орнынан 58 жастағы ер адамның мүрдесі табылды.
Фото: БҚО ТЖД
БҚО ТЖ департаментінің баспасөз қызметінен мәлім еткеніндей, оқиға 18 маусым күні таңға таман болды.
Фото: БҚО ТЖД
«Сағат 04.31-де қаланың 4-шағынауданында көп қабатты үйде өрт болып жатқаны жөнінде хабар түскен. Төртінші қабаттағы пәтерлердің бірінде аумағы 20 шаршы метр асүй бөлмесі отқа оранған. Өрт орнынан пәтер иесі – 1966 жылғы ер адамның денесі шығарылды. Үйдің бесінші қабатынан автобаспалдақтың көмегімен 6 адам эвакуацияланса, соның біреуі – бала. «Тілсіз жау» сағат 05.20-да оқшауланып, 05.30-да ауыздықталды. Қазіргі кезде өрттің шығу себебі, келтірілген шығын анықталу үстінде. Осыған дейін облыста жыл басынан бері өрт салдарынан 3 адам көз жұмған еді», - деп хабарлады ведомстводан.
Еске сала кетейік, бұдан бұрын Оралда 59 жастағы ер адамның өзіне-өзі қол жұмсағанын жазған болатынбыз.
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).