ОРАЛ. ҚазАқпарат - Биылғы 4 тамызда орын алған Ақсай қаласына кіреберістегі газ құю стансасындағы өртке тұрмыстық газ баллонының жануы себеп болған.
Бөрлі ауданы прокуратурасынан түскен мәліметке қарағанда, бұл осы оқиғаға байланысты аудандық ішкі істер бөлімі ҚР ҚК 156-бабы 4-бөлігіне сәйкес (екі және одан көп адамның өліміне соқтырған еңбек қорғау ережесін бұзу) қылмыстық іс қозғап, тергеу жүргізу барысында өрт-техникалық зерттеу қорытындысынан кейін белгілі болды.
Қазіргі кезде БҚО бойынша еңбек инспекциясы басқармасы жұмыс беруші мен қызметкердің кінәсін анықтау мақсатында арнайы тексеру жүргізуде. Кінәлі адамдарды қылмыстық жауапкершілікке тарту мәселесі осы тексеру қорытындысы бойынша шешілетін болады.
Еске сала кетейік, аталмыш газ құю стансасындағы өрт пен екі цистернадағы жарылыстан кейін 58 және 59 жасар екі адам қатты күйік алып, соның салдарынан кейін көз жұмған болатын. Олардың бірі сол станса операторы, екіншісі көлігіне газ құюға келген жүргізуші еді.
Станса «Алау» ЖШС-ына тиесілі.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).