АҚШ G7 мәлімдемесіндегі Ресейдің «агрессор» атауына қарсы

АСТАНА. KAZINFORM — АҚШ «Жетілік топ» (G7) мәлімдемесінде Ресейді Ресей-Украина қақтығысында агрессор деп атауға қарсы, деп жазады The New York Times.

Американың қарсылығы Дональд Трамп осы аптаның басында Ресеймен соғысты «бастаған» Украина екенін мәлімдегеннен кейін туындады.

G7 елдерінің бірінің жоғары лауазымды шенеунігі Канаданың Украинаны қолдау туралы мәлімдеменің алғашқы жобасын басқа алты мүше мемлекетке таратқанын айтты. Оттава жобаны жазуда жетекшілік етті. 

Өз кезегінде америкалық тарап осы аптада бірінші жобаны қарап шығып, украиналық деп түсіндіруге болатын барлық сілтемелерді алып тастады. Нәтижесінде құжат жобасында Ресей қақтығыстағы агрессор немесе Украина басқыншылық құрбаны ретінде аталмай, бейтарап қалды.

Қазір дипломаттар «Ресейдің Украинаға басып кіруінен басталған жойқын соғысты» сипаттайтын, бірақ 2022 жылдан бері G7 мәлімдемелерінде қолданылған «ресейлік агрессия» немесе «агрессор» сөздерін қолданбайтын жобадағы тұжырымдармен жұмыс істеуді жалғастырып жатыр.

Аты-жөнін атамауды сұраған G7 елдерінің жоғары лауазымды шенеуніктерінің бірі мәтінді әзірлеу және үйлестіру дүйсенбіге дейін жалғасуы мүмкін екенін хабарлады.

Reuters ақпарат агенттігінің хабарлауынша, АҚШ Украинаның егемендігі мен аумақтық тұтастығын қолдайтын және Ресей агрессиясын айыптайтын БҰҰ Бас Ассамблеясының қарарының жобасын бірлесіп жасаудан бас тартты.

G7 елдерінің келіссөздері жалғасып жатыр және соңғы тұжырымдар әлі анықталған жоқ.

Бұған дейін Франция президенті Эммануэль Макрон мен Ұлыбритания премьер-министрі Кир Стармер келесі аптада Дональд Трамппен кездесу үшін Вашингтонға баратыны туралы хабарланған болатын.