АҚШ қаржы министрлігі КҚК және Теңізшевройл жобаларының мұнай қызметтеріне қойылған шектеулерді алып тастады

АСТАНА.KAZINFORM - АҚШ-тың қаржы министрлігі Каспий құбыр консорциумы мен «Теңізшевройл» жобалары аясында мұнай кәсіпшілігі қызметтерін көрсетуге рұқсат берді. Бұл туралы бас лицензияда айтылған, деп хабарлайды Kazinform.

— Каспий құбыр консорциумы немесе Теңізшевройл жобаларына қатысты 2025 жылдың 10 қаңтарындағы белгілеумен («Мұнай қызметтеріне тыйым салу») тыйым салынған барлық транзакцияларға рұқсат етілген, — делінген АҚШ Қаржы министрлігінің шетелдік активтерді бақылау басқармасының ресми құжатында.

Айта кетейік, бұған дейін КҚК бас директоры «Кропоткинская» мұнай айдау стансасында қалпына келтіру жұмыстарының аяқталғанын хабарлаған болатын.

«Теңізшевройл» — Атырау облысындағы әлемдегі ең терең мұнай кен орны.

Каспий магистральды мұнай құбырының ұзындығы 1,5 мың км; экспортқа жеткізілетін қазақстандық мұнайдың үштен екі бөлігінен астамы КҚК арқылы тасымалданады.

Айта кетейік, бұған дейін Энергетика министрлігі Каспий құбыр консорциумы арқылы мұнай жөнелтуде шектеу жоқ екенін хабарлаған.