АҚШ Конгресінің Өкілдер палатасы криптовалюта туралы заң жобасын мақұлдады
АСТАНА. KAZINFORM – Сәрсенбі күні Өкілдер палатасы цифрлық активтер нарығын реттеу туралы заң жобасын мақұлдаған кезде криптоиндустрия АҚШ тарихындағы ең үлкен саяси жеңіске қол жеткізді, деп хабарлайды Crypto News.
АҚШ Конгресінің Өкілдер палатасы «ХХІ ғасырға арналған қаржылық инновациялар мен технологиялар туралы заңды» (FIT21) мақұлдау үшін 279-ға қарсы 136 дауыс берді, бұл ретте демократтар өте күшті қолдау көрсетті. Жалпы алғанда, заң жобасына 208 республикашыл мен 71 демократ дауыс берсе, 3 республикашыл мен 133 демократ қарсы болды.
Енді бұл мәселе АҚШ Сенатының қарауында, оның болашағы анық емес, өйткені бұған ұқсас заң жобасы жоқ.
АҚШ криптореттеуді орнатуда басқа жаһандық юрисдикциялардан артта қалды, бірақ мұндай қадағалауды жүзеге асыру аяқталудан әлі алыс.
Көбіне Өкілдер палатасының республикашылдары қолдаған заң цифрлық активтерді жетекші реттеуші және бағалы қағаздармен байланысты емес спот нарықтарын бақылаушы ретінде Тауарлық фьючерстерді саудалау комиссиясын құрады, токен криптовалютасы бағалы қағаз не тауар екенін нақты анықтайды, сол арқылы АҚШ-тың криптовалюта нарықтарын реттеу режимін орнатады, тұтынушылардың құқықтарын қорғайды.
Президент Джо Байден өзінің саяси мәлімдемесінде заң жобасына вето қоятынын айтпаса да, оған қарсы шықты.
Бағалы қағаздар және биржа комиссиясының (SEC) төрағасы Гэри Генслер де заң жобасының қажетсіз екенін және қолданыстағы бағалы қағаздар туралы заңдарға қауіп төндіретінін алға тартып, заңнамаға үзілді-кесілді қарсы шықты.
Өкілдер палатасының Қаржы қызметтері комитетіндегі жоғары лауазымды демократ Максин Уотерс (Калифорния штаты) бұл заң жобасы криптокәсіпорындарға бағалы қағаздар туралы заңдардан жалтарып, жауапкершіліктен құтылуға мүмкіндік береді деп сендірді.
«Олар қазірдің өзінде криптовалюталық бағалы қағаздарды заңсыз шығару немесе сатып алу-сату арқылы миллиардтаған доллар пайда тапты. Ал республикашылдар енді бұл заңсыз әрекеттерді заңды ету арқылы марапаттауды ұсынып отыр», - деді М.Уотерс.