АҚШ үшін маңызды пайдалы қазбалардың жартысына жуығы Қазақстанда - Джули Стаффт

АСТАНА. KAZINFORM —  АҚШ-тың Қазақстандағы елшісі лауазымына үміткер Джули Стаффт Америка Құрама Штаттарының экономикасы мен ұлттық қауіпсіздігі үшін маңызды деп танылған маңызды пайдалы қазбалардың жартысына жуығы Қазақстан аумағында бар екенін мәлімдеді, деп хабарлайды АҚШ Сенатының Халықаралық қатынастар жөніндегі комитеті.

Бұл туралы ол Сенаттың Халықаралық істер жөніндегі комитетінің тыңдауында мәлімдеді. Тыңдау барысында Монтана штатының сенаторы Стив Дейнс Қазақстан уран, литий, мыс, мырыш және сирек жер элементтері сияқты АҚШ пен әлемдік экономика үшін маңызды табиғи ресурстарға бай екенін атап өтті. Осыған байланысты сенатор Джули Стаффттан оның кандидатурасы бекітілген жағдайда, ол Қазақстанға америкалық инвестицияны тартуға қалай ықпал ете алатынын сұрады.

- Қазақстан біз үшін тек бизнес-серіктес ретінде ғана емес, маңызды пайдалы қазбалар саласындағы ынтымақтастық үшін де маңызды. Себебі бұл – сауда саясатының мәселесі ғана емес, ұлттық қауіпсіздік мәселесі. Менің міндетім – америкалық компаниялардың Қазақстанға осы секторға инвестиция салуына жағдай жасау, – деп жауап берді Джули Стаффт.

Бұған дейін Джули Стаффттың АҚШ-тың Қазақстандағы Төтенше және өкілетті елшісі лауазымына кандидатурасы Сенатқа жіберілгенін жазған болатынбыз.

Джули Стаффт бұған дейін АҚШ-тың Молдова, Джибути, Ресей, Эфиопия және Польшадағы елшіліктерінде жұмыс істеген. Сондай-ақ визалық қызметтер жөніндегі басқарушы директор қызметін атқарған.