АҚШ вице-президенті Газа секторындағы бітімді қолдау үшін Израильге барды

АСТАНА. KAZINFORM — Бұл жоғары деңгейлі сапар атысты тоқтату жөніндегі нәзік келісімді нығайтуға бағытталған, деп хабарлайды Kazinform агенттігінің меншікті тілшісі.

АҚШ вице-президенті Джей Ди Вэнс сейсенбі күні Израильге екі күндік сапармен барды. Сапар барысында ол Израиль мен ХАМАС арасындағы бітім шартын жүзеге асыру мәселесін талқылауды жоспарлап отыр.

Бен-Гурион атындағы әуежайға қонғаннан кейін Вэнс елдің оңтүстігіндегі Кирьят-Гат елді мекеніне барды. Онда АҚШ-тың қолдауымен құрылған, бітім шарттарының орындалуын бақылауға арналған халықаралық күштердің штабы орналасқан.

The Times of Israel басылымының Ақ үй өкілдеріне сілтеме жасап хабарлауынша, үйлестіру орталығының құрамына Мысыр, Қатар, Түркия және, болжам бойынша, Біріккен Араб Әмірліктерінің әскери мамандары кіреді. Вэнс бірқатар жабық брифингтер өткізіп, кейін Израиль премьер-министрі Биньямин Нетаньяху және президент Ицхак Герцогпен кездеседі.

БАҚ хабарлауынша, бұл сапар АҚШ әкімшілігінің Израиль басшылығының әрекеттері арқылы бітім бұзылуы мүмкін деген алаңдаушылығы аясында өтіп жатыр.

Бұған дейін New York Times газеті АҚШ президенті Дональд Трамптың әкімшілігі Нетаньяхудың ХАМАС-пен соғыс әрекеттерін қайта бастауынан қауіптеніп отырғанын жазған болатын.

— Сапардың басты мақсаты — қол жеткізілген келісімді нығайтып, қақтығыстың қайта өршуіне жол бермеу, — деді Ақ үй өкілі.

Сапарда Вэнсті АҚШ-тың арнайы өкілі Стив Уиткофф пен Ақ үйдің аға кеңесшісі Джаред Кушнер ертіп жүр.

Айта кетейік, осыған дейін АҚШ президенті Дональд Трамп Газа секторының оңтүстігіндегі Рафах қаласында атысты тоқтату режимін бұзудың артында палестиналық ХАМАС ұйымы тұрғанын айтты.