Судьялар сәрсенбі күні таңертең, 50 жастағы Пайкты өлім жазасына кесуге шамамен бір сағат қалғанда апелляциялық сот берген соңғы сәттегі уақытша тоқтату туралы шешімнің күшін жойды.
Теннесси штатының бас прокуроры Жоғарғы соттан төменгі соттың шешімін жоюды сұраған. Пайк 1996 жылы Коллин Слеммерді өлтіргені үшін өлім жазасына кесілген.
Ол қылмыс жасаған кезде 18 жаста болған. Пайк сол кездегі жігіті Тадарил Шипппен бірге қиындыққа тап болған жасөспірімдерге арналған кәсіптік даярлық лагерінде танысқан 19 жастағы Слеммерді ұрып-соғып, азаптап өлтірген.
Жоғарғы соттың консервативті судьясы Бретт Кавано сәрсенбі күні кешке өлім жазасын тоқтату туралы шешімнің күшін жою жөніндегі өтінішті қанағаттандырды. Қаулыда мұндай шешімнің себебі түсіндірілмеген.
Жоғарғы соттың үш либералды судьясы – Соня Сотомайор, Елена Каган және Кетанджи Браун Джексон – бұл шешімге қарсылық білдірді.
Сотомайор өз қарсылығында бұл шешім Пайктың үкіміне қатысты қаралып жатқан заңды шағымдары «тиісті түрде қаралмай тұрып», Теннесси штатына оны өлім жазасына кесуге жол ашқанын жазды.
– Теннесси билігінің Пайкты өлім жазасына бірнеше күн немесе тіпті бірнеше апта бұрын кесуге деген ұмтылысы оның өз өміріне деген негізгі мүддесінен жоғары тұра алмайды, – деді ол.
Жоғарғы соттың соңғы шешімі жергілікті уақыт бойынша сағат 18:00-ге аз уақыт қалғанда шықты. Штаттың өлім жазасын орындау туралы ордерінің мерзімі түн ортасында аяқталуы тиіс.
Егер осы уақытқа дейін жазаны орындау мүмкін болмаса, Теннесси Жоғарғы соты өлім жазасын орындаудың жаңа күнін белгілеуі қажет болады, деп хабарлайды Associated Press ақпарат агенттігі.
Бұған дейін сәрсенбі күні АҚШ-тың Алтыншы апелляциялық сотының судьялары Пайктың ісіндегі уәждерді қарауға көбірек уақыт қажет екенін айтып, өлім жазасын уақытша тоқтатқан еді.
Пайктың адвокаттары Теннесси штаты бірнеше жыл бойы сотта оның бала кезінде жыныстық зорлық-зомбылыққа ұшырағаны туралы айтқандарының жалған екенін алға тартып келгенін мәлімдеді.
Алайда жақында өлім жазасын орындау әдісіне қатысты өткен сот отырысында штат билігі Пайктың жыныстық зорлық-зомбылық пен зорлауға ұшырағанын жоққа шығармайтынын айтты.
Пайктың қорғаушылары апелляциялық соттан оның өтінішін аудандық сотқа қайтаруды сұрады. Олар егер федералды соттар өз шешімдерін штаттың Пайк өтірік айтты деген бұрынғы мәлімдемесіне негіздеген болса, бұл федералды соттың істі қайта қарауына әсер етті деп уәж келтірді.
Бұл АҚШ Жоғарғы сотының сотталған кісі өлтіруші Пайкты өлім инъекциясы арқылы өлім жазасына кесуге жол ашқан екінші жағдай болды. Бір күн бұрын, сейсенбіде, судьялар Пайктың басқа шағымын қараудан бас тартқан.
Теннесси губернаторы да осы аптада өлім жазасын күтіп отырған Пайктың рақымшылық жасау туралы өтінішін қабылдамады.
Айта кетейік, бұған дейін Башар Асадтың туысы адамзатқа қарсы қылмыс жасағаны үшін өлім жазасына кесілгенін жаздық.
Сондай-ақ Қытайда бұрынғы шенеунік $38 млн пара алғаны үшін өлім жазасына кесілді.