«Ақсу» өз алаңында «Шахтерден» басым түсті

АСТАНА. ҚазАқпарат – Бүгін футболдан премьер-лига командалары арасындағы ел біріншілігінің 17-турында тағы екі ойынның нәтижесі белгілі болды, деп хабарлайды ҚазАқпарат тілшісі.

Павлодар облысының «Ақсу» командасы өз алаңында Қарағандының «Шахтерін» қабылдады.

Ойын барысында павлодарлық клубтан Евгений Кобзарь 38, Андрей Соловей 57-минутта мергендік танытты. Оған қарағандылық клубтан Роман Мұртазаев 70-минутта бір голмен жауап қайырды.

Осылайша «Ақсу» қарсыласынан 2:1 есебімен басым түсті. Нәтижесінде турнир кестесінде 13-орынға көтерілді. Сондай-ақ тағы бір кездесуде «Қайсар» (Қызылорда) мен «Қайрат» (Алматы) 0:0 есебіне қанағат білдірді. Ал елордалық «Астана» Петропавлда «Қызылжардан» 0:1 есебімен жеңіліп қалды.

Енді 30 шілдеде «Каспий» (Ақтау) мен «Ақтөбе», «Атырау» мен «Жетісу» (Талдықорған) кездеседі.

Аталған турдың 10 шілдеде алдын ала өткізілген ойынында «Оқжетпес» (Көкшетау) «Ордабасы» (Шымкент) командасына 0:4 есебімен жол берді.

Ал «Мақтаарал» (Түркістан облысы) мен «Тобыл» (Қостанай) кездесуі белгісіз мерзімге кейінге қалдырылды.