Бұл туралы ҚР көлік вице-министрі Жәнібек Тайжанов Астанада өтіп жатқан TransLogistica Kazakhstan 2026 халықаралық көрмесінде айтты.
Қазір Ақтау портының контейнер өңдеу қуаты жылына 180 мың ДФЭ құрайды. Жаңғыртудың екінші кезеңі аяқталғаннан кейін бұл көрсеткіш 240 мың ДФЭ-ге дейін жетеді деп жоспарланып отыр.
Жәнібек Тайжановтың айтуынша, тапсырыс берілген сегіз кеменің төртеуі Бакуде, қалған төртеуі Қытайда салынып жатыр. Бұдан бөлек, халықаралық логистикалық компаниялармен бірлесіп, жаңа терминалдар салу жобалары қарастырылуда.
— Шетелдік серіктестермен жаңа терминалдар салу жобаларын пысықтап жатырмыз. Бұл порттардың жүк қабылдау және өткізу мүмкіндігін одан әрі арттыруға бағытталған, — деді вице-министр.
Ақтау және Құрық порттары Қытайдан Еуропаға жүк жеткізетін Транскаспий халықаралық көлік дәлізінің маңызды бөлігі саналады. Бұл бағытта жүктер Қазақстан аумағымен теміржол арқылы тасымалданып, Каспий теңізі арқылы Әзербайжанға, одан әрі Еуропаға жеткізіледі. Порттардың өткізу қуатын арттыру халықаралық жүк ағынын қабылдау мүмкіндігін кеңейтуге ықпал етеді.
Айта кетейік, TransLogistica Kazakhstan 2026 халықаралық көрмесі 14–16 қазан аралығында Астанадағы EXPO халықаралық көрме орталығында өтіп жатыр. Биыл оған 20 елден 230 компания қатысуда. Көрмеде көлік инфрақұрылымы, теміржол және теңіз тасымалы, қойма логистикасы мен жүк өңдеу технологиялары таныстырылып жатыр.