АҚТАУ. ҚазАқпарат - Ақтауда Ұлттық ұлан жауынгерлері иісшіл иттің көмегімен қос бірдей нашақорды қолға түсірді, деп хабарлайды ҚазАқпарат тілшісі.
ҚР Ұлттық ұланы «Батыс» өңірлік қолбасшылығының баспасөз қызметінен түскен мәліметке қарағанда, оқиға 7-шағынауданда орын алды.
Кешкі сағат 22.00 шамасында құрамында 3-сыныпты сержант Ғабит Ғадилов, қатардағы жауынгерлер Николай Николаев, Қанат Қасымов және кинолог маман Талғат Батыршин бар топ қызметтік ит Лизаның көмегімен №17 үйдің жанынан өтіп бара жатқан ер адамды ұстады. Ит ер адамның қасынан кетпей, үріп, белгі берді. Оны тоқтатып, тексерген кезде қалтасынан марихуана табылды.
Жарты сағаттай уақыттан кейін №21 үйдің жанында күдікті тағы бір ер адам қолға түсіп, оның да қалтасынан жасыл түсті есірткі заты салынған орама шықты. Лиза бұл жолы 48 жасар тұрғыннан есірткі исін сезді. Бұл ер адам да қалалық полиция басқармасына жеткізілді.
Қырағылығы мен кәсіби іс-әрекеттері үшін аталған жауынгерлер бөлім командирімен ынталандырылды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).