Ақтауда зейнеткерлер компьютермен жұмыс істеуді және ағылшын тілінде сөйлеуді үйренді
АҚТАУ. KAZINFORM – Аймақта егде жастағы 30 дан астам тұрғын «Күміс жас» жобасы аясында жедел курс оқып, сертификат алды. Енді олар Маңғыстауға келген туристерге гид-экскурсовод қызметін көрсетеді. 3 айлық оқуда олар компьютермен жұмыс істеуді және ағылшын тілінде сөйлеуді үйренген.
Гид-экскурсовод сертификатын иеленгендердің бірі – 66 жастағы Ақтау қаласының тұрғыны Ақшай Бешакова. Ол 30 жыл бойы дәрігер болып жұмыс істеген. Зейнеткерлікке шыққан соң өзін жаңа қырынан сынап көрмек.
«Зейнеткерлікке шыққалы үйде отырдым. Қоғамнан ажырап қалады екенсің. Ал мына «Күміс университет» бізге көп мүмкіндік берді. Бізді оқуға шақырып, курс оқытты. Енді осы білімімді пайдаланып, жұмыс істесем деймін. Туристік фирмаларға біз туралы мәліметтер жіберілді», - дейді ол.
Курс бітірген зейнеткерлердің ең жасы 52-де. Ал ең үлкені биыл 87 жасқа шығады. Солардың бірі – Түркменбай Көкімбаевтың жасы 83-те. Ол да курс оқып, сертификат алды. Енді ол туристерге өңіріміздің тарихын айтып, киелі орындарды таныстырмақ ниетте.
«Маңғыстау – ашық аспан астындағы мұражай, тұнған тарих қой. Оны біз айтпағанда кім айтады? Біз туралы мәліметтер экскурсия орталықтарына жіберілді. Егер сол экскурсовод керек болса, бізді шақырады. Шақырмаса да, біз өзіміз барайық деп тұрмыз. Біз үшін өткізіп жатқан курстары өте жақсы», - дейді Түркменбай Көкімбаев.
«Күміс университеті» жобасының алғашқы курсы модульдік жүйе бойынша оқытылған. Яғни қатысушылар экскурсия ұйымдастырып, өткізуді, экскурсиялық маршрут пен экскурсоводтың портфолиосын жасауды үйренген.
«Енді осы курсты жетілдіреміз. Ауқымдап, оның интеграциясын көбейтеміз. Өзіміздің оқытушы-профессорларымыз құрамынан, біздің білім алушыларымыздан кері байланыс алдық. Ұзақ мерзімді емес, тоқсандық мерзімдегі курсқа жалғастырамыз ба деген ойымыз бар. Қазір бір мамандықтан бастадық, енді қосымша мамандықтар санын талқылаймыз», - дейді жоба үйлестірушісі Берік Ахметов.