Ақтауда зорланған 6 жасар қыздың өмірі үшін соңғы мүмкіндікке дейін күресеміз - Дүйсенова

АСТАНА. ҚазАқпарат - Ақтауда зорланған 6 жасар қыздың ем-домы үшін барлық жағдайлар жасалады. Бұл туралы бүгін Парламент Мәжілісіндегі Үкімет сағатынан кейін ҚР Денсаулық сақтау және әлеуметтік даму министрі Тамара Дүйсенова мәлім етті, деп хабарлайды ҚазАқпарат.

«Ол қызымыздың жағдайы өте ауыр. Дәрігерлер оның өмірі үшін соңғы мүмкіндікке дейін күресеміз деп отыр және осы бағытта тиісті шараларды жалғастырып келеді. Мен қандай да бір болжам жасай алмаймын, бірақ біз міндетті түрде баланың жағдайын жасауға әрекет етеміз»,-деді министр.

Еске сала кетейік, 20 тамызда Ақтауда алты жасар қыз жоғалып кетті. Бірнеше сағаттан кейін полицейлер баланы өндірістік аймақ ауданынан тапты. Қыз бала облыстық балалар ауруханасына жатқызылды, оған ыстық өткен және денесінде көптеген жарақат бар. Дәрігерлер зорлау фактісін анықтады, ҚР ҚК 120-бабымен қылмыстық іс қозғалды.

27 тамызда алты жасар қыз Маңғыстау облыстық балалар ауруханасынан санавиациямен Астанаға жеткізілді.