Ақтаудың іргесінде картаға кірмеген аты жоқ ауыл бар
АҚТАУ. KAZINFORM — Елді мекеннің тұрғындары 20 жылдан бері тұрғылықты жерін заңдастыра алмай жүр. Себебі, ауыл ресми тіркелмеген.
— Ақтау қалалық әкімдігі бізге дұрыс жауап бермейді. Сосын жер қатынастары мекемесіне бардық. Олар барып көреміз, содан кейін әкімдікте ақылдасамыз, құжаттарды көтереміз деп шығарып салды. Міне, осылай уақыт созып келеді, — дейді ауыл тұрғыны Камила Хашимова.
Аты жоқ елді мекенде 12 отбасы тұрады. Балалар Ақтау қаласындағы мектепке барып оқиды. Ауылға қоғамдық көлік қатынамайды. Жедел жәрдем де келмейді.
— Менің денсаулығым нашар, көзім көрмейді. Бір аптадан бері ауырып жатырмын. Дәрігерге бара алмай отырмын. Автобус та қатынамайды, — дейді ауыл тұрғыны Эльмира Расулова.
Тұрғындар электр энергиясы үшін заңды тұлғаның тарифімен қыруар қаражат төлеуге мәжбүр. Ал, газ құбырын құжаттың жоқтығынан жүргізе алмай отыр.
Ақтау қалалық жер қатынастары бөлімі берген мәліметке сүйенсек, аталған жер Ақтау қаласының аумағына жатады әрі өндірістік аймақ саналады.
Бұрын бұл жерде әскери құрылыс жасағының жұмысшыларына арналған тұрғын үйлер тұрғызылған. Кейін тұрғындар үйлерін жекешелендіріп, ал кейбірі мұны жасамаған.
— Тұрғындар электр қуатының ақысын заңды тұлға ретінде төлеп отырғанының себебі — олардың есептегіші «Ақтау Сүт» ЖШС аумағында орналасқан. Олар электр энергиясына жеке тұлға ретінде төлеуі үшін үйлерді заңдастыруы қажет. Бұл мәселені шешу жолдарын қала әкімдігіндегі жауапты бөлімдер коммуналдық кәсіпорындармен бірлесіп қарастырып жатыр, — делінген хабарламада.
Бұған дейін Маңғыстауда жаңадан бой көтеретін Кендірлі курорттық қаласының бас жоспары әзірленгенін жазған болатынбыз.