Ақтаудың тең жартысы жарықсыз отыр

АҚТАУ. KAZINFORM – Қала тұрғындары электр энергиясының жиі өшуіне жаппай шағымданып жатыр. Айтуларынша, жарық бірде бар, бірде жоқ. Әсіресе, соңғы екі-үш күнде аптап ыстықта қатты қиналып отырғандарын айтуда.

Қала көшелерінде де бағдаршамдар жұмыс істемей тұр. Бірнеше жолдың қиылысында көлік қозғалысын полиция қызметкерлері реттеуде.

Ал, Ақтау электр желілері басқармасы баспасөз қызметінің хабарлауынша, жарықтың өшуіне - аптап ыстық себеп. Салдарынан электр желілерге жүктеме артып, апатты жағдайлар болған.

- 7, 9, 11, 12, 13, 14, 27, 28, 29, 29а, 30 шағын аудандарда ішінара жарық өшті. Бригада жұмыс істеп жатыр, - делінген хабарламада.

Соңғы мәліметтерге сүйенсек, 7, 9, 14 шағын аудандарда электр жарығы қосылған. 

Бұған дейін, Ақтау қаласының жылу желілерін реконструкциялауға Үкімет резервінен 3,6 млрд теңге бөлінгені турады жазған болатынбыз.