«Ақтөбе» командасына жаңа бапкер тағайындалды

АСТАНА.KAZINFORM – Қазақстандық «Ақтөбе» командасы словакиялық маман Штефан Тарковичпен келісімшартқа қол қойды. Бұл жөнінде «Ақтөбе» футбол клубының баспасөз қызметі мәлім етті.

Штефан Таркович 1973 жылы 18 ақпанда дүниеге келген. 1996 жылдан бастап словакиялық бірқатар клубта өнер көрсетті. Бапкер ретінде Словакия, БАӘ клубтарында еңбек етсе, 2023-2024 жылдары Қырғызстан құрамасын жаттықтырды. 

Айта кетейік, «Ақтөбе» командасы биылғы біріншілікті сәтсіз бастады. Алғашқы үш турда бір мәрте жеңіске жетіп, қалған кездесулерде қарсыластарына есе жіберді. Қазір турнир кестесінде 3 ұпаймен 10-орында тұр. Осы жағдайға байланысты болгариялық маман Николай Костов қызметінен кетті.

Былтырғы футбол маусымының ортасында 62 жастағы маман команданы жетекшілік етіп, чемпионатта 5-орынға табан тіреді. 2025 жылдың тамызынан бері Костовтың басшылығымен «Ақтөбе» ҚПЛ аясында 10 ойын өткізді. Оның төртеуін жеңсе, біреуінде тең ойнап, қалған бесеуінде жеңіліске ұшырады.

Футболдан Қазақстан Премьер-лигасының төртінші турында ақтөбелік клуб 5 сәуірде сырт алаңда Жезқазғанның «Ұлытау» командасымен кездеседі.