Ақтөбе прокуратурасы қаңтар қырғынына қатысты тергеу қалай жүріп жатқанын айтты
Ақтөбе облыстық прокуратурасы құқық қорғау органдарымен бірлесіп, қаңтар айындағы оқиғаларды тергеу жұмыстарын жалғастырып жатыр.
Ақтөбеде бейбіт митинг алдымен Жаңаөзен қаласының наразылық білдірушілерін қолдаудан басталса, кейін түрлі күштермен жаппай тәртіпсіздік ұйымдастырылған.
Ұйымдастырушылар полицейлерге күш қолдана отырып, облыс әкімдігінің ғимаратын басып алды. Мемлекет мүлкін бүлдірді (230 млн теңге шығын), сонымен қатар Ақтөбе қаласы әуежайының жұмысы тоқтап, ұшақтардың ұшуы тоқтатылды.
Арандатушылардың ықпалымен Әйтеке би, Хромтау, Темір және Мұғалжар аудандарында да акция өтті.
«Қазіргі уақытта құқық қорғау органдарының тәжірибелі қызметкерлерінен құралған ведомствоаралық жедел-тергеу тобы және арнайы прокурорлардың басшылығымен 14 қылмыстық іс, соның ішінде 2 террористік қылмыс бойынша сотқа дейінгі тергеу жүргізіліп жатыр. Күдікті ретінде 12 адам қамауға алынып, 8 адам үй қамаққа жіберілді. Сондай-ақ құқықтық тәртіпті қамтамасыз еткен 31 қызметкер жараланды. Қызметтік көлік және арнайы құралдар зақым келтірілді. Барлығына байланысты құқық қорғау органдары объективті құқықтық баға береді», - деп хабарлады облыстық прокуратураның баспасөз қызметі.
Айта кетейік, тергеудің рұқсат етілмеген әдістерін қолданған полиция қызметкерлеріне қатысты да сотқа дейінгі 4 тергеу жұмысы жүргізіліп жатыр.
Барлық іс бойынша процессуалдық прокурор тағайындалды.
«Ұсталғандардың туыстары мен олардың қорғаушылары үшін Ақтөбе облысының прокуратурасында күнделікті жеке қабылдау ұйымдастырылды. Оларға барлық қажетті құқықтық және түсіндіру көмегі көрсетіледі. Өтініштер мен шағымдар қарастырылады. Кезекші прокурордың телефонына келіп түскен қоңыраулар зерделенеді», - хабарлады облыстық прокуратураның баспасөз қызметі.