Ақтөбеде 12 жасар қызды емдеуге жиналған қаржы банк шотынан жоғалып кетті

АҚТӨБЕ. ҚазАқпарат - Ақтөбеде 12 жастағы қыздың еміне жиналған қаржы банк есепшотынан із-түзсіз жоғалып кетті. Қазіргі уақытта полиция Қылмыстық кодекстің «Алаяқтық» бабы бойынша іс қозғады, деп хабарлайды ҚазАқпарат тілшісі.

Ақтөбе қаласының еріктілері 2019 жылдың наурыз айына жоспарланған ота үшін қаржы жинауға көмектескен болатын. Туабітті сал ауруына шалдыққан Мария Максаковаға ота жасау үшін Санкт-Петербургке жол жүру жоспарланған болатын. Алайда Каспи банк есепшотынан 790 мың теңге жоғалып кеткен.

«Әлеуметтік желі арқылы Мария Максакованың еміне ақша жиналды. Бірақ Каспи банкте тұрған қаржы пин-кодсыз басқа адамға аударылып кетті. Бұған дейін де көмек үшін өзге адамдарға ақша жиналды, ата-аналар білместікпен бөгде адамға пин-код беріп қойған еді. Мұнда ешкімге ешқандай ақпарат берілмеген. Кімнің алғанын білмейміз. Каспи банктен жағдайды түсіндіруді сұрап отырмыз. Бірақ ресми хат жазбадық», - дейді волонтер Екатерина Голотина.

Қазір осы оқиғаға байланысты қылмыстық іс қозғалып, тергеу жүріп жатыр.

«Полиция бейтаныс адамға карта нөмірін айтуға болмайтынын ескертеді. Барлық ақпарат тұтынушының қауіпсіздігі үшін құпия сақталуы керек. 7 наурыз күні белгісіз біреулер көмек көрсетемін деп алдап, карта нөмірін және құпия CVV-кодын біліп алған. Карта Каспи банкке тиесілі. Есепшоттан 790 мың теңге алынған. Бұл қаржы баланың еміне жиналған екен. Қазіргі уақытта «Алаяқтық» бабымен тергеу жүріп жатыр», - деп хабарлады облыстық полиция департаментінің баспасөз қызметі.

Айта кетейік, Мария Максакованың анасы қандай да бір ақпарат беруден бас тартты.