Ақтөбеде мүгедектігі бар 500 адам баспана алу құқығынан айырылған

АСТАНА. KAZINFORM — Ақтөбе қалалық прокуратурасы қалалық жұмыспен қамту және әлеуметтік бағдарламалар бөлімін тексеру барысында 1-ші және 2-ші топтағы мүгедек 500 адамның баспанаға мұқтаждар ретінде тіркелмегендігін анықтады. Бұл туралы ведомствоның баспасөз қызметі мәлім етті.

Бұл деректер мүмкіндігі шектеулі адамдардың құқықтарын бұзу саналады. Себебі кезекке тіркеу — оларды қолжетімді баспанамен қамтамасыз етудің кепілі.

Заңға сәйкес, жеке баспанасы жоқ мүгедектер кейіннен әлеуметтік баспана алуды немесе өмір сүру жағдайларын жақсарту үшін мемлекеттік қолдау алуды қажет ететіндердің тізімінде болуға құқылы.

— Сонымен қатар, Конституция күніне орай 39 мүгедекке 1 950 000 теңге көлемінде әлеуметтік көмек көрсетпеу, сондай-ақ 17 азаматқа 850 000 теңге көлемінде бір реттік төлем төлемеу деректері анықталды. Сондай-ақ, 1-ші топтағы мүгедектерге жеке оңалту бағдарламасын әзірлемеу және 200 ЖОБ-сын іске асырмаудың 152 деректері анықталды. Қазіргі уақытта мүгедектердің құқықтары қалпына келтіріліп, олар баспана есебіне алынып, барлық қажетті төлемдер өтелді, — делінген қалалық прокуратура хабарламасында.

Еске салсақ, бұдан бұрын Ақтөбеде депо бастығы пара алып сотталғаны белгілі болды.