Ақтөбеде Орқаш орманын қорғауға техника жетпейді
АҚТӨБЕ. KAZINFORM – Орқаш орман шаруашылығындағы орманшылардың алқапты аралап, бақылау жүргізуі қиынға соғып тұр. Мұнда 30-дан астам қызметкер үшін екі көлік бар. Өрт сөндіру бекеті биыл қолданысқа берілуі тиіс.
Темір орман шаруашылығы құрамында болған Орқаш орман шаруашылығы 2023 жылдың ақпан айында қайта бөлінді. Жалпы ауданы 57 мың гектардан асатын аумақтың 10 мың гектарға жуығында ағаш егілген. Сонымен бірге дәл осы мекемеге Құмжарған-Көкжиде ерекше қорғалатын аумағы кіреді. Мекемеде 36 адам еңбек етеді. Оның 14 орман күзетшісі, 3 орман шебері, орманшы бар.
«Орманда 300-ден астам өсімдік түрі бар. Оның 32-і сирек кездесетін өсімдік. Екеуі Қызыл кітапқа енген. Марзянка және қырыққұлақтың сирек кездесетін түрі осында бар. Қырыққұлақ мұз дәуірінен қалған өсімдік. Орқаш орманы мен Алтай туы бөктерінде кездеседі. Мұны 2015 жылы Қазақстан-Ресей экспедициясы кезінде өңірге келген профессор Александр Чибилев дәлелдеп кетті. Ал ағаш түрлеріне келер болсақ, қарағай, ақ қайың, терек, жиде, қарағаш та бар. Жануарлардан қабан, елік, қоян, түркі, қасқыр кездеседі. Мұғалжар тауы тиіп тұрған соң қасқыр келеді, бірақ көп емес. Көктем мен күзде бұлан миграциясы тіркеледі», - деді Орқаш орман және жануарлер дүниесі қорғау мекемесінің директоры Камшат Ермағамбетов.
Қазіргі кезде бұрынғы Орқаш, қазіргі Қаракөл ауылында өрт сөндіру бекеті салынып жатыр. Әзірге орманшылар қолда бар өрт сөндіру құралын ғана місе тұтып жүр. Оларда сапалақ және арқаға асатын су бүріккіш аппараты бар.
«Өрт қауіпті кезеңде орман күзетшілерінің жұмысы күшейеді. Оларға екі ғана жеңіл көлік қарастырылған. Бұл аз. Әр орманшының бақылайтын, қадағалайтын аумағы бар. Оған жету біраз уақыт алады. Ал аудан орталығы бізден 60 шақырым қашықтықта орналасқан. Осыдан-ақ орманды сақтауда қиындық бар екенін ұғынуға болады. Бізге шаруашылықтың техникасын көбейтіп берсе дейміз. Арада бір жылдан астам уақыт өтсе де жұмыс кеңсесі жоқ. Жеке кәсіпкердің ғимаратында отырмыз келісіп. Машина-трактор шеберханасы, жанар-жағармай сақтау орны, қойма да жоқ. Ал трактор жеткілікті. Бізде жер жыртып, тасымалдау үшін 6 трактор бар», - деді Камшат Ермағамбетов.
Орқаш орманына адамдардың кіріп, тынығуына болады. Орманшылар арнайы сәкі мен ас дайындайтын ошақ құрып қойған. Күз бен көктемде ағаштың қураған бұталарын кесіп, жинап, дайындайды. Бұл – орман ішіндегі қауіпсіздікті сақтауға арналған амал.
«Мұнда адамдар жиі келеді. Сенбі, жексенбі тіпті босамайды. Бұл жаққа арналған турмаршруттың кестесі бұрын жасалып, биыл сұранысқа ие. Келушілер орман ішін аралап, Тілеубұлақ үңгіріне барады. Сонымен бірге тұзды көлге де түсіп, денсаулығын шыңдайды. Осы турмаршрут аясында кәсіп бастағысы келетін жергілікті тұрғындар да кездеседі. Олар келушілерге ас мәзірін ұсынып, саумал берсе, демалысты жақсы өткізуге арналған жобаларды дайындаса болады. Мұның бәрі алдағы жылдардың еншісіндегі жұмыс», - деді Камшат Ермағамбетов.
Айта кетейік, 2025 жылы Орқаш орманы алқабын дамыту жоспары дайындалады. Алдын ала мамандар келіп, бағдарламасын бекітеді.