АСТАНА. ҚазАқпарат – Ақтөбе қаласында 18 жасқа дейінгілер арасында бесінші санаттағы ITF Juniors жарысында қазақстандықтар Виталий Зацепин мен Ділназ Машабаева абсолютті чемпион атанды, деп хабарлайды ҚазАқпарат тілшісі.
Қарағанды теннис мектебінің түлегі В. Зацепин жекелей сында финалда ресейлік Дмитрий Бурцевті 6:2, 6:1 есебімен ойсырата ұтты.
Жұптық сында Виталий алматылық Кирилл Колгановпен бірге соңғы бәсекеде елордалықтар Давид Джавадов - Илья Ведмедьті 6:2, 6:2 есебімен ұтты.
Бұл – В. Зацепиннің ITF Juniors турнирлеріндегі 10-ыншы титулы (үшеуі жекелей, жетеуі жұптық сында). К. Колганов жұптық сында екінші рет чемпион атанды.
Қыздар арасында Д. Машабаева шешуші кездесуде ресейлік Дарья Кузнецованы 6:4, 6:4 есебімен тізе бүктірді.
Алматы теннис мектебінің түлегі жұптық сында тартысты өткен финалда командалас әріптесі Сати Әубәкіровамен бірге ресейлік Ксения Еременко - қазақстандық Әсем Шойбектен айласын асырды – 6:1, 6:7, 12:10.
Бұл – Ділназдың осындай додалардағы төртінші титулы (үшеуі жұптық, біреуі жекелей сында) болса, Сати тырнақалды табысына қол жеткізді.
Еске сала кетейік, бұдан бұрын Қазақстан теннисшілерінің жаңа маусымға Дубайда дайындалатынын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).