Ақтөбеде «Таза Қазақстан» бағдарламасы аясында «Ескерткіш – ел тарихы» акциясы өтті
АҚТӨБЕ. KAZINFORM – 29 тамызда Ақтөбе облысында «Таза Қазақстан» бағдарламасы аясында өткен «Ескерткіш – ел тарихы» акциясына өңір жастары белсенді түрде қатысты.
Іс-шараға қатысқан «Жас Инвент» жастар ұйымының көшбасшысы Дана Жүсіп халқымыздың мәдени-тарихи мұрасын сақтауға үлес қосуды, ұлы қайраткерлерімізді еске алуды міндеті санайтынын жеткізді.
Акцияның басты мақсаты – тарихи ескерткіштерді сақтау және мәдени-тарихи мұраны қорғау мәселелеріне жұртшылықтың назарын аударту.
Ақтөбе облысында ескерткіштерді қалпына келтіру, сондай-ақ олардың бастапқы келбетін қалпына келтіру бойынша жоспарлы жұмыстар жүргізіліп жатыр. Өйткені, олардың арқасында өткенмен байланыс сақталады және мұра болашақ ұрпаққа беріледі.
«Ескерткіш – ел тарихы» акциясы интернационалист-жауынгерлерге арналған ескерткіш-обелиск және аштық пен саяси қуғын-сүргін құрбандарына арналған мемориалда өтті.
«Жас Инвент» жастар ұйымының белсенділері ескерткіштер аумағындағы қоқыстарды тазартты, ал мердігер ұйымдар жарылған плиткаларды ауыстырды, ескерткіштердің жарықтандырылуын жаңартты.
Ескерткіштер аумағын жөндеу, абаттандыру мен тазалау акциясы облыстың барлық ауданында өтті.
Анықтама: Ақтөбе облысында мемлекеттік тізілімге енгізілген барлығы 863 ескерткіш бар. Оның 9-ы республикалық, қалғандары жергілікті маңызы бар ескерткіштер. Сондай-ақ археологиялық ескерткіштер – 669, монументалды өнер ескерткіштері – 58, қала құрылысы және сәулет ескерткіштері – 87, ансамбльдер – 6, киелі нысандар саны – 43. Бұдан өзге, тарихи-мәдени мұра объектілерін алдын ала есепке алу тізімінде 1 431 нысан тіркелген.