Ақтөбеде түрлі деңгейдегі мәслихаттардың 10 депутаты сайланады

АҚТӨБЕ. KAZINFORM — Бүгін үміткерлерді ұсыну басталды. Сайлау 26-қазан күні болады.

ҚР «Сайлау туралы» Заңына сәйкес жыл сайын наурыз және қазан айларының соңғы жексенбісінде шығып қалған депутаттардың орнын толықтыру үшін сайлау өтеді. Ақтөбеде түрлі деңгейдегі мәслихаттың 10 депутатының орны бос тұр.

— Ақтөбе қалалық мәслихатының екі депутаты және 6 ауданда 8 депутаттың орны бар. Олар Қарғалы ауданынан 1, Ырғыздан 1, Байғаниннен 1, Шалқар мен Хромтаудан 2 депутат және Ойылда 1 депутат орны. Кандидаттарды ұсыну бүгін басталып, 25-қыркүйек сағат 18:00–ге дейін жалғасады. Тіркеу 30-қыркүйек күні сағат 18:00–де аяқталады. Содан кейін 25-қазан сағат 00:00–ге дейін үгіт-насихат жүргізіледі. Сайлауды өткізуге 7 аумақтық, 10 округтік және 31 учаскелік сайлау комиссиясы жұмылдырылады, — деді Ақтөбе облыстық сайлау комиссиясының хатшысы Асылжан Бүркіталин. Оның айтуынша, депутаттардың бірі көшіп кетсе, екіншісі мемлекетке қызметке орналасқан.

Сондай-ақ 5-қазан күні Әйтеке би ауданы Жабасақ ауылдық округінде әкім сайлауы өтеді. Ауылдық округ әкіміне кандидаттар ұсыну 28-тамызда басталады.

Айта кетейік, шілдеде Ақтөбеде 19 ауылдық округ және бір ауыл әкімі сайланды.