ОРАЛ. ҚазАқпарат - «Ақжайық» футбол клубы жанкүйерлердің Ақсайға барып-қайтуы үшін арнайы автобус шығарды, деп хабарлайды ҚазАқпарат тілшісі.
Премьер-лига командалары арасында ел біріншілігінің үшінші турында Оралдың «Ақжайығы» өз алаңындағы алғашқы ойынын 31 наурыз күні Ақсай қаласындағы «Қарашығанақ» стадионында өткізеді. Сол күні жергілікті сағат 14.00-де украиналық маман Владимир Мазярдың шәкірттері чемпионатта әзірге жеңіліс таппай, көш бастаушылардың қатарында келе жатқан Павлодардың «Ертісін» қабылдайды.
Арнайы автобус жанкүйерлерді тегін апарып, алып қайтады. Стадионға кіру де тегін.
«Мамыр айына дейін ойындар Ақсай қаласында өтеді. Күн жылынып, қалыпқа түскеннен кейін Оралдағы П.Атоян атындағы стадионға көшеміз. Қазіргі кезде команда алдағы кездесуге дайындық үстінде. «Ақжайықтың» жеңіс үшін барын салатыны анық», - деді «ҚазАқпарат» тілшісіне «Ақжайық» футбол клубының директоры Нұртаза Әбілханов.
Фото: fishki.net
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).