ОРАЛ. ҚазАқпарат – Премьер-лигада өнер көрсететін «Ақжайық» футбол клубының бас бапкері, украиналық маман Владимир Мазяр орнында қалатын болды, деп хабарлайды ҚазАқпарат тілшісі.
В.Мазяр ел чемпионатының 16-турында Алматыда «Қайратпен» өткен матчтан кейін өз орнынан кететіні жөнінде мәлімдеген болатын.
«Ақжайық» футбол клубының басшылығы осыдан соң ойыншылар мен бас бапкердің арасында кездесу өткізген.
«Клуб ойыншылары бапкерді толықтай қолдады – бұл басшылыққа оның орнынан кетуі жөніндегі өтінішін қабылдамауға негіз болды. Жазғы трансферлік кезеңде команда жаңа ойыншылармен күшейтіледі. Бұл команданың ішіндегі бәсекелестікті арттырып, жағдайды түзеуге септеседі», - деп хабарлады «Ақжайық» футбол клубынан.
Қазіргі кезде оралдықтар турнир кестесінде 12 ұпаймен 13-орында, яғни бірінші лигаға түсіп қалу қаупі төніп тұр.
«Ақжайық» 8 шілде күні Қазақстан кубогы үшін Қызылордада жергілікті «Қайсармен» кездеседі.
Еске сала кетейік, бұдан бұрын футболдан Қазақстан чемпионатында «Ақтөбенің» көш бастағанын жазған болатынбыз.
Фото: www.instagram.com/fcakzhayik
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).