ӨСКЕМЕН. ҚазАқпарат – Шығыс Қазақстан облысы Үржар ауданындағы әуежайда реконструкция жұмыстары туристік маусымға дейін аяқталады. Бұл жайлы аймақ басшысы Даниал Ахметов Үржар ауданына жұмыс сапары барысында мәлім етті, деп хабарлайды ҚазАқпарат тілшісі.
«Қазіргі уақытта әуежайда қайта жаңарту жұмыстары қызу жүріп жатыр. Ұшу-қону жолағындағы жұмыстар аяқталуға жақын. Туристік маусымның басында әуежай күндізгі уақытта демалушыларды қабылдауға дайын болады. Аудан әкіміне үшінші мамырға дейін әуежайдың бейнебақылау және сыртқы жарықтандыру жүйелерін орнату жобасына қосымша түзетулер енгізуді тапсырдым», - дейді облыс әкімі.
Оның айтуынша, кірме жолдарда жұмыстар әлі жалғасуда. Сондай-ақ әуежайда жаңа терминал құрылысына жобалық-сметалық құжаттама дайындалуда.
Еске салайық, осыған дейін Алакөл маңындағы әуежай жөндеуден өтіп жатқанын хабарлаған едік.
Талғатжан Мұхаметбекұлы
Өскемендегі С.Аманжолов атындағы ШҚУ-ды "Журналистика" мамандығы бойынша тәмамдаған. Еңбек жолын 2015 жылы ШҚО "Алдаспан" газетінде тілші болып бастады. ШҚО "Менің өлкем" газетінде тілші, республикалық "Жас қазақ", "Заң" газеттерінде Шығыс Қазақстан облысы бойынша меншікті тілші, ШҚО "Менің өлкем" газетінің бас редакторы қызметтерін атқарған. Kazinform агенттігінде 2021 жылдан бері жұмыс істеп келеді.