Алакөлдегі фестивальді 10 мыңнан аса демалушы тамашалады
Өңірдің туристік ақпарат орталығының директоры Сымбат Рамазановтың айтуынша, биыл Алакөл қонақтарды жаңа жағалауы, жергілікті арбаты мен игілендірілген жағажайымен ғана емес, мәдени-көпшілік бағдарламаларымен де таңқалдырды.
Алғаш рет өткізілген «Алакөл алаулары» жазғы фестивалі қонақтарды екі күн бойы қуанышқа бөледі. «Фестивальге Еуропа мен Орталық Азия, Қытай, Ресей елдерінен келген туристер қатысты. Адамдар алған әсерлері мен жақсы пікірлерімен әлеуметтік желілерде бөлісіп, суреттер жүктеді.
Фестивальге Өскемен аспаптық тобы қатысты, файер-шоу, отшашу, түрлі спорттық-ойын-сауық конкурстары ұйымдастырылды, фотоаймақтар жұмыс істеді және осы екі күн бойы көптеген қызықты бағдарламалар болды, - деді С.Рамазанов.
Шығыс Қазақстандағы Алакөл жағалауы туризмді дамыту үшін негізгі нысандардың бірі болып табылады. Биыл алғаш рет облыстық бюджеттен жағалауды абаттандыру үшін 500 млн 580 мың теңге бөлінді. Қазан айының соңында 1 млрд 305 млн теңге сомасына есептелген Мақаншы-Жалаңашкөл бағытындағы жолды жөндеу жұмыстарны аяқталады.