Алдағы сайлау ел, демократиялық құнды­лық­тарды нығайту үшін үлкен маңызға ие - республикалық басылымдарға шолу

***

Мемлекет басшысы Нұрсұлтан Назарбаев алдағы Парламент Мәжілісі мен мәслихаттар сайлауына байланысты үндеу жариялады. «Егемен Қазақстан» газетінің сенбілік санында жарық көрген Елбасы Үндеуінде: «Алдағы сайлау ел, демократиялық құнды­лық­тарды нығайту үшін үлкен маңызға ие. Мемлекет тарапынан ашық, әділ, мөлдір және бәсекелі сайлау өткізу үшін барлық жағдай жасалған. Электораттық науқанның барлық кезеңде­рін­де заңдылықтың сақталуы қамтамасыз етілді. Саяси партияларға бұқаралық ақпарат құрал­дарына теңдей қолжетімділік берілді. Барлық сайлау үдерісіне қатысушылар сайлаушыларды өздерінің сайлауалды тұғыр­на­маларымен таныстыру үшін кең мүмкін­дік­ке ие болды. Біздің азаматтарымыз сонымен бір мез­гілде саясаткерлердің сөз саптастарын бақы­лай отырып, кімнің кім екенін көрді», - делінген.

Кеше Конституциялық Ке­ңес төрағасы И.Роговтың бесінші сайланатын Қазақстан Республикасы Парламенті Мә­жілісі депутаттарының кезектен тыс сайлауына және мәслихаттар депутаттарының кезекті сайлауына мониторинг жасап жүрген халықаралық байқаушылар миссияларымен кездесулері өтті. Осы жүздесулер «Егемен Қазақстан» газетінің сенбілік санында жарияланған «Конституциялық кеңестегі әңгіме» деген тақырыптағы мақалаға арқау болған. Басылымның атап өтуінше, кездесу барысында И.Рогов еліміздің басшылығы алдымызда келе жатқан сайлаулардың Конс­ти­туцияға және халықаралық стан­дарттарға сай ашық әрі әділ өтуіне үлкен мән беріп отыр­ға­нын атап өтті.

                                                                                            ***

«Казахстанская правда» газетінің жазуынша, кеше Ақордада Мемлекет басшысы Нұрсұлтан Назарбаев ЕҚЫҰ ПА құрметті президенті, ЕҚЫҰ Пар­ламенттік Ассамблеясының Қа­зақ­стандағы кезектен тыс парла­мент­тік сайлауды байқау жөніндегі делегациясының басшысы Жоао Соарешты қабылдады. Әңгімелесу барысында алдағы Қазақ­стандағы парламенттік сайлау мәселесі мен байқаушылар миссиясының қыз­меті талқыланды. Мемлекет басшысы Жоао Соарешке Қазақстанның ЕҚЫҰ-ға төрағалық етуіне және 2010 жылы Астана саммитін өткізуге қолдау көрсеткені үшін өз ризашылығын білдірді. Жоао Соареш Қазақстанның дамып, елде орасан өзгерістер болып жатқанына өзінің сүйсінетінін атап өтті. Ол Пре­зи­денттің Жаңаөзен қаласында парламент­тік сайлау өткізу туралы шешімін оң бағалағанын, ЕҚЫҰ байқаушылары­ның біраз бөлігі Жаңаөзенде жұмыс істейтінін атап көрсетті.