АСТАНА. KAZINFORM — Қазақстанның бірінші ракеткасы Александр Бублик алдағы дүйсенбіде жаңартылатын ATP рейтингісінде алғаш рет ТОП-20-ға кіреді.
Дубай турнирінің финалына шыққаннан кейін А.Бублик қазіргі кезде ATP Live рейтингісінде 23-тен 19-орынға көтеріліп тұр.
Қазақстандық теннисшінің Дубай ATP 500 жарысының финалындағы қарсыласы белгілі болды.
Доданың өткен жылғы жеңімпазы, әлемнің 4-ракеткасы, ресейлік Даниил Медведев күтпеген жерден рейтингіде 18-орындағы франциялық Уго Умберге жол берді – 5:7, 3:6.
Осылайша, сенбі күні А.Бублик пен У.Умбер чемпиондық атақты сарапқа салады.
Бұл Александр Бубликтің спорттық жолындағы ATP жарыстарындағы 11-інші финалы болмақ. Бұған дейін ол екі рет Монпельеде, сондай-ақ Антверпен пен Галледе үздік шыққан еді. Ал алты финалда жеңіліп қалған еді.
Еске сала кетейік, бұдан бұрын Александр Бубликтің Дубайда әлемнің 5-ракеткасын жеңіп, финалға шыққанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).