АСТАНА. KAZINFORM – Қазақстан ерлер құрамасының көшбасшысы Александр Бублик 11-19 қазан аралығында өтетін Almaty Open ATP 250 турнирінде ойнайды.
Қазақстан теннис федерациясынан мәлім еткеніндей, А.Бубликтің еліміздегі жылдың басты теннис жарысына қатысатыны ресми расталды.
Александр Бублик – әлемдегі ең танымал ойыншылардың бірі. Ол бес рет АТР турнирлерінде чемпион атанған: Галле АТР 500 (2023, 2025), Монпелье АТР 250 (2022, 2024) және Антверпен АТР 250 (2024).
Александр Бублик қазақстандық жанкүйерлердің көз алдында Almaty Open ATP 250 турнирінде алғаш рет өнер көрсетпек.
- Өз алаңымызда ойнау ерекше жауапкершілік үстейді әрі үлкен дем береді. Мен Алматы кортына шығу сәтін асыға күтемін, жанкүйерлерімізді жарқын ойын, жақсы нәтижемен қуантамын деп үміттенемін. Өз жанкүйерлеріміздің қолдауы әрқашан күш береді, - деді теннисші.
Еске сала кетейік, бұдан бұрын қазақстандық жас теннисшілердің Қырғызстандағы турнирде үздік шыққанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).