Қазақстанның бірінші, әлемнің 36-ракеткасы Александр Бублик Бельгиядағы Антверпен ATP 250 турнирінің жартылай финалына шықты, деп хабарлайды Kazinform.
Жарыстың үшінші ракеткасы болып тіркелген қазақстандық теннисші ширек финалда дүниежүзілік рейтингте 226-орында тұрған 20 жастағы франциялық Джованни Мпетчи Перрикармен сынға түсті.
Бірінші партияда Александр 6:4 есебімен басым түсті. Екіншісінде франциялық спортшы есе қайырды - 6:4.
Шешуші, үшінші сетте Бублик 3:1 есебімен алға кетті. Ақыры матчты жеңіспен түйіндеді - 6:2.
Сағат жарымға жуық уақытқа созылған матчта А.Бублик 8 эйс жасап, 6 брейк-пойнттың төртеуін пайдалана білді. Қарсыласы 18 эйс, 2 брейкпен (3 брейк-пойнт) көзге түсті.
Александр Бублик финалға шығу үшін әлемнің 96-ракеткасы, франциялық Хьюго Гастон немесе рейтингте 127-сатыдағы германиялық Максимилиан Мартерердің біреуімен таласады.
Еске сала кетейік, бұдан бұрын Жібек Құламбаеваның ITF турнирінің финалында ойнайтынын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).